Կարեն Աղամալյան․ Այս առաջնությունն ավելի ուժեղ է լինելու, քան Տոկիոյի Օլիմպիական խաղերի մրցաշարը

Հովհաննես Բաչկովի օլիմպիական բրոնզե մեդալը փոխել է հավաքականի հոգեբանությունը: Բռնցքամարտիկների, նաեւ ինձ համար պարտավորեցնող է: Պետք է շարունակենք, որ Փարիզ-2024-ից առանց մեդալ չվերադառնանք: Այս հոգեբանությամբ այժմ թիմը պատրաստվում է աշխարհի առաջնությանը:

Այս մասին NEWS.am Sport-ի թղթակցի հետ զրույցում ասաց բռնցքամարտի տղամարդկանց Հայաստանի հավաքականի  նորանշանակ գլխավոր մարզիչ Կարեն Աղամալյանը:

Սեպտեմբերի 1-6-ը Երեւանի «Դինամո» մարզադահլիճում անցկացվեց բռնցքամարտի Հայաստանի առաջնությունը: Մրցումային օրերին Հայաստանի բռնցքամարտի ֆեդերացիան ներկայացրեց հավաքականի նոր գլխավոր մարզիչին՝ Կարեն Աղամալյանին:

Հայաստանի առաջնությունում չեմպիոններ են դարձել Սեյրան Եղիկյանը (48 կգ), Արթուր Հովհաննիսյանը (51 կգ), Վահե Բադալյանը (54 կգ), Արթուր Բազեյանը (57 կգ), Կարեն Տոնականյանը (60 կգ), Նարեկ Հովհաննիսյանը (63.5 կգ), Գուրգեն Մադոյանը (67 կգ), Արսեն Գրիգորյանը (71 կգ), Վախթանգ Հարությունյանը (75 կգ), Ռաֆայել Հովհաննիսյանը (86 կգ), Նարեկ Մանասյանը (92 կգ) և Դավիթ Չալոյանը (+92 կգ):

Առաջնության արդյունքներով ձեւավորված հավաքականը սկսում է հոկտեմբերին Սերբիայում անցկացվելիք աշխարհի առաջնության նախապատրաստական փուլը։ Մինչ այդ թիմը Կարեն Աղամալյանի գլխավորությամբ կմասնակցի Մոսկվայում անցկացվելիք բանակայինների աշխարհի առաջնությանը:

Պարոն Աղամալյան, շնորհավորում եմ հավաքականի գլխավոր մարզիչի պաշտոնում կրկին նշանակվելու կապակցությամբ: Ի՞նչ պատկեր է հավաքականում Հայաստանի առաջնությունից հետո:

Հայաստանի առաջնությունում ինձ համար նոր անուններ չկային: Երկու-երեք բռնցքամարտիկ երիտասարդներից համալրեց մեծահասակների հավաքականը, բայց դեռ իրենց տեղերը չեն ամրապնդել կազմում: Երկար աշխատանք է պետք անել թիմում:

Արդեն մշակված է այս տարվա մրցումային ծրագիրը: Պատրաստվում ենք աշխարհի առաջնությանը: Սեպտեմբերի 18-ից Ծաղկաձորում կանցացնենք երկշաբաթյա հավաք, որն ուղղված կլինի ընդհանուր ֆիզիկական պատրաստվածությանը: Հաջորդ հավաքը կանցկացնենք Երեւանի «Օլիմպավանում»: Հոկտեմբերի 22-ին կմեկնենք Սերբիա, որտեղ էլ տեղի է ունենալու աշխարհի առաջնությունը:

Կարեւոր մրցաշարից առաջ եք գլխավորում հավաքականը: Պատասխանատու չէ՞:

Հենց այդ առիթով սկզբում չէի ցանկանում գլխավորել, բայց այնպես ստացվեց, որ համաձայնեցի: Այս աշխարհի առաջնությունը շատ կարեւոր է լինելու մեզ համար: Պետք է լավ ներկայանանք եւ մեդալների կռիվ տանք:

Հնարավոր է՝ 2022 թվականի մեծահասակների Եվրոպայի առաջնությունը մայիսին անցկացվի Երեւանում: Այս առումով շատ լավ պետք է ներկայանանք աշխարհի առաջնությանը: Մինչ այդ մեծ աշխատանք ունենք անելու:

Հայաստանի առաջնությունից ազատված էր Հովհաննես Բաչկովը: Դեռ պարզ չի՝ նա կմասնակցի աշխարհի առաջնությանը, թե ոչ: Կարծում եմ՝ մինչ երեւանյան հավաքը պարզ կլինի նրա մասնակցության հարցը: Ամեն դեպքում, երկար ու ճիշտ աշխատանք է պետք թիմի հետ, որ լավ արդյունքներ ունենանք:

Ի՞նչ մակարդակում է հավաքականն այսօր: Ի՞նչ կազմ եք ստացել նախորդ մարզիչներից:

Այն կազմը, որը ձեւավորվեց Հայաստանի առաջնության արդյունքներով, բավարար է. միջին վիճակում են բռնցքամարտիկները: Չեմ կարող ասել՝ մեկ ամսվա ընթացքում կհասցնենք տղաների մարզավիճակը բարձրացնել, թե ոչ. դժվար է լինելու: Ամեն ինչ կանենք, որ լավ մարզավիճակում ներկայանանք:

Արդեն որոշվա՞ծ է աշխարհի առաջնության կազմը:

Եվրոպական խաղերի չեմպիոն Արթուր Հովհաննիյանը հավաքականում է եւ ուղիղ պատրաստվում է աշխարհի առաջնությանը: Կազմն ինձ համար գրեթե տեսանելի է: Քաշային կարգերն ավելացել են. 12-ն են: Մենք ներկայացուցիչներ կունենանք 10 քաշային կարգում: Դեռ ոչինչ հստակ չէ: Գուցե նաեւ կազմում ընդգրկեմ այնպիսի բռնցքամարտիկների, որոնք ոչ թե կոնկրետ մեդալի համար պայքարեն, այլ փորձեն ուժերն աշխարհի առաջնությունում: Ինձ պետք է տեսնել, թե ինչ բռնցքամարտ են անում նրանք աշխարհի մակարդակով:

Մոտավորապես թիմի կորիզը պարզ է, բայց որոշ քաշերում դեռ կողմոնորոշվում եմ: Սեպտեմբերի 17-26-ը Մոսկվայում տեղի կունենա բանակայինների աշխարհի առաջնությունը, որին Հայաստանը կմասնակցի 6 բռնցքամարտիկով: Ինձ համար այս առաջնությունից հետո վերջնական պարզ կլինի, թե ինչ կազմով ենք մեկնելու Սերբիա:

Իսկ ովքե՞ր են ընդգրկված Բանակայինների աշխարհի առաջնության կազմում:

48 կգ՝ Սեյրան Եղիկյան, 60 կգ՝ Արթուր Ղազարյան, 64 կգ՝ Նարեկ Հովհաննիսյան, 67 կգ՝ Արմեն Մնացականյան, 86 կգ՝ Ռաֆայել Հովհաննիսյան եւ +92 կգ՝ Դավիթ Չալոյան: Նրանք այն տղաներն են, որոնք իրենց արդյունքներով կվաստակեն աշխարհի առաջնության մասնակցելու իրավունք: Նրանց առաջ խնդիր եմ դրել՝ լավագույնս հանդես գալ, ամենաքիչը երկու-երեք մենամարտ հաղթել: Ամեն դեպքում՝ անպատրաստ մարդ աշխարհի առաջնությանը չի գնալու:

Ի՞նչ ակնկալիքներ կան աշխարհի առաջնությունից:

Այս առաջնությունն ավելի ուժեղ է լինելու, քան Տոկիոյի Օլիմպիական խաղերի մրցաշարը: Մեծ թվով երկրներ են մասնակցելու, ամբողջական կազմերով: Մեծ մրցանակային ֆոնդ կա ԱԻԲԱ-ի հովանավորի՝ «Գազպրոմի» կողմից: Չեմպիոնները ստանալու են 100 հազար շվեյցարական ֆրանկ, փոխչեմպիոնները՝ 50 հազար, բրոնզե մեդալակիրները՝ 20 հազար: Շատ ծանր մրցաշար է լինելու, իսկական կռիվ մեդալի համար:

Պարոն Աղամալյան, Հովհաննես Բաչկովի նվաճած բրոնզե մեդալը Տոկիո-2020-ում փոխե՞լ է բռնցքամարտիկների հոգեբանությունը:

Կարծում եմ՝ այո: Դա պարզ կլինի մրցումների ժամանակ: Կարծում եմ՝ հավաքականի անդամներից յուրաքանչյուրն իր վրա պատասխանատվություն է զգում լավագույնս ներկայանալ մրցաշարերում: Որպես մարզիչ, ես էլ մեծ պատասխանատվություն եմ զգում: Չեմ դժգոհում, որ այս պահին միջին վիճակում եմ թիմը գլխավորում: Պարտավորեցնող է, հաղթանակներ պետք է ունենանք, շարունակենք:

Օլիմպիական ցիկլի մեկնարկում եք գլխավորում հավաքականը: Ի՞նչ խնդիր եք դրել Ձեր առջեւ:

Այսօրվանից պետք է պատրաստվենք հաջորդ Օլիմպիական խաղերին՝ Փարիզ-2024-ին: Երեք տարի ժամանակ ունենք, որեւէ կանխատեսում չեմ ուզում անել: Ինձ համար որոշ բաներ աշխարհի առաջնությունից հետո պարզ կլինի: Ամեն դեպքում՝ խնդիրը Փարիզ-2024-ից մեդալներով վերադառնալն է:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում