Կապառոս. Հարոյանից բացի, այլ հայ խաղացողները ևս կարող էին հայտնվել իսպանական ֆուտբոլում, սակայն վերջում չստացվեց

Ֆուտբոլի Հայաստանի հավաքականի գլխավոր մարզիչ Խոակին Կապառոսը Երևանում տեղի ունեցած ասուլիսում ազգային թիմի կազմը հրապարակելուց հետո պատասխանել է հայ լրագրողների հարցերին: Կորոնավիրուսային համավարակով պայմանավորված սահմանափակումների պատճառով իսպանացի մասնագետն առաջին անգամ է հանդիպել հայ լրագրողների հետ:

«Շատ հաճելի է գտնվել այս սրահում, որը մարդաշատ է: Կարծում եմ՝ արդեն սկսվում է կյանքի նորմալ ընթացքը: Ֆուտբոլը, որը մեր կյանքի ու մասնագիտության մի մասն է, ունի ձեր ու երկրպագուների կարիքը:

Ինչ վերաբերում է կազմին, այս ցուցակում ընդգրկված ֆուտբոլիստներն ապագայի համար չեն, աջևում ունենք շատ կարևոր խաղեր: Ցուցակը կազմելիս չենք նայել ո՛չ վերև, ո՛չ ներքև, այլ կենտրոնացել ենք այս խաղերի վրա:

Բրիասկո Բալեկյանի բացակայությունը պայմանավորված է կորոնավիրուսային սահմանափակումներով, քանի որ Արգենտինա վերադառնալուց հետո նա պետք է 2 շաբաթով ինքնամեկուսանար:

Առաջիկա խաղերի մասին կասեմ, որ Գերմանիայի հավաքականի հետ հանդիպումը շատ հեռու է այս պահին, քանի որ ամբողջությամբ կենտրոնացած ենք մակեդոնացիների դեմ խաղի վրա: Գերմանիայի հավաքականը շատ ուժեղ է ու համալրված է բարձրակարգ խաղացողներով, իսկ մարզիչն ունի ընտրության լայն հնարավորություն:

Հաշվի առնելով Հենրիխ Մխիթարյանի որակները՝ նա կարող է խաղալ տարբեր դիրքերում:

«Կադիսի» նախագահն ու ակումբի աշխատակիցները շատ գոհ են Վարազդատ Հարոյանից ու նրա դրսևորած պրոֆեսիոնալիզմից: Վարազդատը կարողանում է հարմարվել իսպանական ֆուտբոլիսն, ինչը հեշտ գործ չէ: Նա մեզ ասաց, որ շատ գոհ է ամեն ինչից: Դա շատ լավ է հայկական ֆուտբոլի համար: Հուսանք, որ ապագայում կհայտնվեն երիտասարդ հայ ֆուտբոլիստներ, որոնք կխաղան եվրոպական առաջատար առաջնություններում: Մենք ունենք այլ ֆուտբոլիստներ, որոնք ևս կարող էին հայտնվել իսպանական ֆուտբոլում, սակայն վերջում չստացվեց:

Դավիթ Յուրչենկոյի վնասվածքի մասին կասեմ, որ նա բժիշկների վերահսկողության տակ է, պետք է սպասենք: Բնականաբար, ֆուտբոլիստը պետք է 100 տոկոսով պատրաստ լինի, որպեսզի կարողանանք հույսեր կապել նրա հետ:

Ժիրայր Շաղոյանն ունի խաղային պրակտիկայի պակաս, բայց այս կազմի մեծ մասն այդ առումով խնդիր չունի: Ես մեծ ուշադրություն եմ դարձրել այդ հարցին, քանի որ ֆուտբոլիստը միշտ պետք է գտնվի խաղային ռիթմի մեջ: Սակայն կան խաղացողներ, որոնց դեպքում կարող ենք անել բացառություն: Շաղոյանն այդպիսի խաղացողներից է:

Մենք վաղուց էինք հետևում Էրիկ Վարդանյանին և պատահական չէ, որ նա հրավիրվել է հավաքական: Դեռ նախորդ մրցաշրջանից էինք հետևում Հրայր Մկոյանին, նա անցկացրել է շատ հանդիպումներ: Մենք ուշադրություն չենք դարձնում տարիքին: Առաջին խաղում ունենք մեծ կորուստ՝ Վարազդատ Հարոյանի բացակայությունը: Մկոյանը կարող է շատ հաջող փոխարինել Հարոյանին: Հրայրն իր ցուցադրած վիճակագրությամբ արժանացել է հավաքական հրավիրվելուն:

Հայաստանի առաջնությունը բավարարվածություն է տալիս ինձ այս պահին, քանի որ նվազագույնը 6 հայ ֆուտբոլիստ դաշտում տեսնում եմ խաղի ընթացքում: Երբ մենք առաջին անգամ ժամանեցինք Հայաստան, խաղադաշտում չէինք տեսնում հայ ֆուտբոլիստների: Կարծում եմ՝ պետք չէ բավարարվել այս ամենով: Պետք է հասնենք այն օրվան, երբ խաղադաշտում կտեսնենք ամենաշատը 2-3 լեգեոնականներ: Այդ պարագայում մենք ավելի մեծ ընտրության հնարավորություն կունենանք ազգային հավաքականի համար:

Ցավալի է, երբ տրիբունաները լինում են դատարկ, քանի որ ֆուտբոլի ոգին երկրպագուներն են»,- նշել է իսպանացի մասնագետը:

Հայաստանի հավաքականն օգոստոսի 29-ից ՀՖՖ Տեխնիկական կենտրոն/Ֆուտբոլի ակադեմիայում կսկսի պատրաստվել Հյուսիսային Մակեդոնիայի (սեպտեմբերի 2), Գերմանիայի (սեպտեմբերի 5) ու Լիխտենշտեյնի (սեպտեմբերի 8) հավաքականների հետ ԱԱ-2022-ի ընտրական փուլի եվրոպական գոտու մրցաշարի J խմբի առաջիկա հանդիպումներին:

Հիշեցնենք, որ ԱԱ-2022-ի ընտրական մրցաշարի մեկնարկային 3 տուրերում Հայաստանի հավաքականը հաղթել է Լիխտենշտեյնին (1:0), Իսլանդիային (2:0), Ռումինիային (3:2) և 9 միավորով J խմբի առաջատարն է: Գերմանիան ու Հյուսիսային Մակեդոնիան ունեն 6-ական միավոր, Ռումինիան ու Իսլանդիան՝ 3-ական, իսկ Լիխտենշտեյնը կրել է 3 պարտություն:

Հայաստանի հավաքականի կազմը

Դարպասապահներ. Դավիթ Յուրչենկո («Ալաշկերտ»), Արսեն Բեգլարյան («Ուրարտու»), Անատոլի Այվազով («Ուրարտու»):

Պաշտպաններ. Հովհաննես Համբարձումյան («Անորտոսիս»), Կամո Հովհաննիսյան («Կայրաթ»), Վարազդատ Հարոյան («Կադիս»), Անդրե Կալիսիր («Սիլկեբորգ»), Արման Հովհաննիսյան («Փյունիկ»), Տարոն Ոսկանյան («Ալաշկերտ»), Հրայր Մկոյան («Արարատ»), Դավիթ Տերտերյան («Արարատ-Արմենիա»):

Կիսապաշտպաններ. Հենրիխ Մխիթարյան («Ռոմա»), Տիգրան Բարսեղյան («Աստանա»), Դավիթ Դավիդյան («Խիմկի»), Արտակ Գրիգորյան («Ալաշկերտ»), Վբեյմար Անգուլո («Արարատ-Արմենիա»), Վահան Բիչախչյան, («Ժիլինա») Խորեն Բայրամյան («Ռոստով»), Սոլոմոն Ուդո («Ատիրաու»), Էդաուրդ Սպերցյան («Կրասնոդար»), Ժիրայր Շաղոյան («Արարատ-Արմենիա»), Արշակ Կորյան («Օրենբուրգ»), Էրիկ Վարդանյան («Փյունիկ»), Արտյոմ Ավանեսյան («Արարատ-Արմենիա»):

Հարձակվողներ. Սարգիս Ադամյան («Հոֆենհայմ»), Ալեքսանդր Կարապետյան («Նոա»), Իշխան Գելոյան («Բալտիկա»):

Հետևեք NEWS.am SPORT-ին Facebook-ում, Twitter և Telegram-ում