00:00 , 16 մայիսի, 2021

Հենրիխ Մխիթարյանն անձնական ռեկորդ սահմանեց Եվրոպայի թոփ-5 լիգաներում (ֆոտո)

«Ռոմայի» կիսապաշտպան Հենրիխ Մխիթարյանը, գոլի հեղինակ դառնալով «Լացիոյի» դեմ Իտալիայի առաջնության նախավերջին՝ 37-րդ տուրի խաղում (տեսանյութ), սահմանել է անձնական ռեկորդ:

Դա Հայաստանի ազգային հավաքականի ավագի 12-րդ գոլն էր Իտալիայի ընթացիկ առաջնությունում, որտեղ նա դարձել է նաև 11 գոլային փոխանցման հեղինակ: Եվրոպայի թոփ-5 առաջնություններում (Անգլիա, Իսպանիա, Իտալիա, Գերմանիա, Ֆրանսիա) 32-ամյա Մխիթարյանն առաջին անգամ է 12 գոլ խփում մեկ մրցաշրջանում, հայտնում է Opta-ն:

Մխիթարյանը 2020 թվականի սեպտեմբերին Լոնդոնի «Արսենալից» է տեղափոխվել «Ռոմա», որի հետ նրա գործող պայմանագիրը նախատեսված է մինչև հունիսի 30-ը:

Հայաստանի հավաքականի ավագը նախկինում հանդես է եկել նաև Երևանի «Փյունիկում» (2006-2009), Դոնեցկի «Մետալուրգում» (2009-2010), Դոնեցկի «Շախտյորում» (2010-2013), Դորտմունդի «Բորուսիայում» (2013-2016) և անգլիական «Մանչեսթեր Յունայթեդում» (2016-2018):

12 + 3 - Henrikh #Mkhitaryan has scored 12 Serie A goals this season, a record for him in a single campaign in the top-5 European leagues; he has also found the net in three consecutive matches for the first time among Serie A, Premier League and Bundesliga. Artist.#RomaLazio pic.twitter.com/NxWHL03zIb
— OptaPaolo (@OptaPaolo) May 15, 2021