«Ռոմայի» լեգենդար կիսապաշտպան Դանիելե Դե Ռոսին կարող է դառնալ պորտուգալացի մասնագետ Ժոզե Մոուրինյոյի օգնականն իտալական ակումբում։
Il Messaggero-ի համաձայն՝ 37-ամյա իտալացուն հրավիրելու գաղափարը պատկանում է «Ռոմայի» մարզական տնօրեն Տյագու Պինտուին:
Այս տարվա մարտին Դանիելե Դե Ռոսին ընդգրկվել էր Իտալիայի ազգային հավաքականը գլխավորող Ռոբերտո Մանչինիի մարզչական շտաբում: Նա նոր է սկսում մարզչական կարիերա։
Դե Ռոսին 2019 թվականին էր ավարտել ֆուտբոլիստի կարիերան, իսկ նրա վերջին ակումբն էր արգենտինական «Բոկա Խունիորսը»։ Իտալիայի ազգային հավաքականում նախկին կիսապաշտպանը 2004-2017-ն անցկացրել է 117 հանդիպում և դարձել 21 գոլի հեղինակ։ «Ռոմայում» նա խաղացել է 2002–2019-ը։
Հիշեցնենք, որ մայիսի 4-ին «Ռոման» պաշտոնապես հայտարարել էր, որ այս մրցաշրջանի վերջում թիմի գլխավոր մարզիչի պաշտոնում պորտուգալացի Պաուլու Ֆոնսեկային կփոխարինի վերջերս Լոնդոնի «Տոտենհեմից» հեռացված 58-ամյա Մոուրինյոն: Պորտուգալացի մասնագետի պայմանագիրն իտալական ակումբի հետ նախատեսված կլինի մինչև 2024 թվականի ամառ:
Ժոզե Մոուրինյոն ապրիլի 19-ին էր հեռացվել «Տոտենհեմից»: Մարզիչը 2019-ի նոյեմբերից էր գլխավորում անգլիական ակումբը, որը նրա գլխավորությամբ բոլոր մրցաշարերում անցկացրել է 86 հանդիպում, տարել 44 հաղթանակ, կրել 23 պարտություն ու գրանցել 19 ոչ ոքի:
Հետևեք NEWS.am SPORT-ին Facebook-ում, Twitter և Telegram-ում