Բռնցքամարտի Եվրոպայի կրկնակի չեմպիոն, աշխարհի առաջնության բրոնզե մեդալակիր, Հայաստանի հավաքականի ավագ, 64 կգ քաշային Հովհաննես Բաչկովը պրոֆեսիոնալ ռինգում երկրորդ մենամարտը կանցկացնի Ղազախստանի Ալմաթի քաղաքում տեղի ունենալիք պրոֆեսիոնալ բռնցքամարտի #MTKFightNight երեկոյի ընթացքում։ Այս մասին Եվրոպայի կրկնակի չեմպիոնը հայտնել է Instagram-ի իր միկրոբլոգի story բաժնում:
Մենամարտը տեղի է ունենալու փետրվարի 27-ին: Mtkglobal.com-ը դեռ չի հայտնում հայ բռնցքամարտիկի երկրորդ մրցակցի անունը:
Գյումրեցի բռնցքամարտիկն առաջին մենամարտը պրոֆեսիոնալ ռինգում անցկացրել է 2020 թվականի հոկտեմբերի 9-ին Դուբայում տեղի ունեցած Rotunda Rumble IV երեկոյի ընթացքում, որտեղ մրցավարների միաձայն որոշմամբ հաղթել է 32-ամյա վենեսուելացի Սամուել Գոնսալեսին: Նորամուտի հաղթանակը Բաչկովը նվիրել էր հայ զինվորին:
Հիշեցնենք, որ 2020 թվականի հուլիսին Բաչկովը 3 տարվա պայմանագիր էր կնքել MTK Global մենեջերական ընկերության հետ: Ըստ պայմանագրի, պրոֆեսիոնալ ռինգում հանդես գալուն զուգահեռ, Եվրոպայի կրկնակի չեմպիոնը կնախապատրաստվի նաեւ Տոկիոյի Օլիմպիական խաղերի վարկանիշային մրցաշարերին։
Հետևեք NEWS.am SPORT-ին Facebook-ում, Twitter և Telegram-ում