16:03  ,  18 հունվարի, 2021

Կարեն Գիլոյան. Հրաշագործ չեմ, բայց վստահեցնում եմ, որ դրական փոփոխությունները երկար չեն սպասեցնի (ֆոտո)

ԿԳՄՍ նախարարի տեղակալ, մարզական հեռուստամեկնաբան Կարեն Գիլոյանն այցելել է Ծաղկաձորի մարզահամալիր, որտեղ ուսումնամարզական հավաք են անցկացնում հունահռոմեական և ազատ ոճի ըմբշամարտի ու բռնցքամարտի Հայաստանի հավաքականները։ Նախարարի տեղակալը, Ծաղկաձորի մարզահամալիրում հետևելով մրցաշրջան 2021-ին նախապատրաստվող հավաքականների մարզումներին, ընդգծել է դրանք հնարավորինս արդյունավետ անցկացնելու կարևորությունը, քանի որ Օլիմպիական խաղերին շատ ժամանակ չի մնացել, փոխանցում է ԿԳՄՍ նախարարության մամուլի ծառայությունը:

Դիմելով մարզիկներին՝ Կարեն Գիլոյանը վստահեցրել է, որ անելու է առավելագույնը, որպեսզի նրանք բարձր արդյունքներ գրանցեն․ «Ձեզանից ակնկալում եմ միայն լավ մարզվել և Հայաստանը պատվով ներկայացնել։ Հասկանալի է, որ համավարակն ու պատերազմը շատ փոփոխություններ են բերել մեր կյանք, բայց ես խոստանում եմ անել առավելագույնը, որպեսզի դուք դժվարություններ չզգաք։ Գիտեմ ձեր խնդիրները և նաև գիտեմ դրանք լուծելու ճանապարհները։ Հրաշագործ չեմ, բայց վստահեցնում եմ, որ դրական փոփոխությունները երկար չեն սպասեցնի։ Այնպես որ, եթե լինենք միասնական, դուք լավ կատարեք ձեր աշխատանքը, իսկ նախարարությունը՝ իր, ապա ցանկալի արդյունքները չեն ուշանա։ Ջանք մի՛ խնայեք վարկանիշային մրցաշարերին լավագույնս պատրաստվելու համար, լսե՛ք մարզիչներին, եղե՛ք պրոֆեսիոնալ և ձեր մեդալներով հպարտանալու հնարավորություն տվե՛ք»։

Նախարարի տեղակալը մարզիկներին տեղեկացրել է, որ շուտով կկարգավորվեն բուժծառայության խնդիրները, որոնց մասին նրանք բարձրաձայնել էին անցյալ տարեվերջին՝ ՀՀ ԿԳՄՍ նախարար Վահրամ Դումանյանի հետ հանդիպման ժամանակ․

«Առողջապահության նախարարության հետ ունեցել ենք միջգերատեսչական քննարկումներ, որոնց արդյունքում շատ շուտով կլուծվեն ձեր՝ որակյալ բժշկական ծառայություններ ստանալուն առնչվող բոլոր խնդիրները։ «Սուրբ Գրիգոր Լուսավորիչ» ԲԿ-ի առանձնացված մասնաշենքում մարզիկները պատշաճ մակարդակով կստանան բոլոր բուժումները։ Բացի դրանից՝ շուտով կունենաք անհրաժեշտ դեղորայք և վիտամիններ, անգամ՝ այնպիսիք, որոնք անհրաժեշտ են բարձր արդյունք ցույց տալու համար, սակայն Հայաստանում առայժմ գրանցված չեն: Այս հարցերը նույնպես քննարկել և լուծել ենք Առողջապահության նախարարության հետ»։

Անդրադառնալով մարզիկներին մտահոգող մեկ այլ՝ միջազգային մրցումների ժամանակ մրցավարական սխալների հետևանքով մեդալներից զրկվելու հարցին՝ Գիլոյանը վստահեցրել է, որ երբեք չի թողնի՝ հայ մարզիկն արտերկրում իրեն մենակ և անպաշտպան զգա․ 

«Առաջիկայում պաշտոնական այցեր եմ կատարելու մի շարք երկրներ՝ հանդիպելու սպորտի ոլորտը համակարգող նախարարների և տվյալ երկրում միջազգային ֆեդերացիայի ներկայացուցիչ լինելու դեպքում՝ նաև նրանց հետ բարձրաձայնելու եմ մրցավարության հետ կապված խնդիրները։ Դուք ինձ կտեսնեք ձեր բոլոր հավաքներին և հնարավորության դեպքում՝ արտասահմանում կայանալիք մրցումներին։ Ես ձեզ համար 24 ժամ հասանելի եմ, դուք երբեք չպետք է տուժեք անարդարության պատճառով»։

Մարզիկների հետ հանդիպումից հետո ՀՀ ԿԳՄՍ նախարարի տեղակալը քննարկում է ունեցել նաև մարզիչների հետ։ Նա ընդգծել է, որ ի նպաստ հայկական սպորտի զարգացման՝ պատրաստվում է համագործակցել մարզական բոլոր կառույցների հետ։ Կարեն Գիլոյանն առանձնահատուկ անդրադարձել է հայկական բռնցքամարտում առկա տարաձայնություններին՝ նշելով, որ պետք է բացառել մարզաձևն «իմ»-ի և «քո»-ի բաժանելու միտումը, ինչի հետևանքով բռնցքամարտիկները միմիայն տուժում են։ Նախարարի տեղակալը՝ տեղեկացնելով, որ առաջիկա օրերին քննարկումներ է ունենալու և՛ ՀՀ բռնցքամարտի ֆեդերացիայի, և՛ Բռնցքամարտի հայկական ազգային ֆեդերացիայի ղեկավարների հետ, փաստել է՝ նախարարությունն աշխատելու է այն ֆեդերացիայի հետ, որին կճանաչի Բռնցքամարտի միջազգային ֆեդերացիան (AIBA)։

«Մենք շատ մրցակիցներ և թշնամիներ ունենք, այնպես որ՝ իրար դեմ պայքարելու փոխարեն հարկ է նրանց դեմ պայքարել։ Խնդրում եմ՝ մի՛ կողմ դրեք անձնական ամբիցիաները, համագործակցե՛ք, որպեսզի մարզիկները չտուժեն»,- խոսքը եզրափակել է Կարեն Գիլոյանը։

Հանդիպման ընթացքում քննարկվել են նաև աշխատանքային մի շարք հարցեր:

Հիշեցնենք, որ ՀՀ վարչապետ Նիկոլ Փաշինյանի որոշմամբ՝ Կարեն Գիլոյանը դեկտեմբերի 30-ին նշանակվել էր ԿԳՄՍ փոխնախարար: 

Հետևեք NEWS.am SPORT-ին Facebook-ում, Twitter և Telegram-ում