Թրամփ. NBA-ն նմանվել է քաղաքական կազմակերպության

ԱՄՆ նախագահ Դոնալդ Թրամփը քննադատության է ենթարկել Բասկետբոլի ազգային ասոցիացիային (NBA)՝ անվանելով այն քաղաքական կազմակերպություն:

«NBA-ն նմանվել է քաղաքական կազմակերպության: Բասկետբոլիստները նշում են, որ պայքարում են հանուն մարդու իրավունքների, սակայն նրանք երբեք չեն խոսում Չինաստանում մարդկանց իրավունքների ոտնահարման մասին, իսկ Չինաստանում NBA-ն մեծ թվով երկրպագուներ ունի:

Կարծում եմ`այն, ինչ անում է NBA-ն, լավ չէ ոչ սպորտի, ոչ էլ մեր երկրի համար»,- Դոնալդ Թրամփի խոսքը փոխանցում է Sky News-ը:

Հիշեցնենք, որ «Միլուոկիի» բասկետբոլիստները բոյկոտել էին «Օռլանդոյի» դեմ Բասկետբոլի ազգային ասոցիացիայի (NBA) 1/8 եզրափակիչի շարքի չորրորդ հանդիպումը:

Բասկետբոլիստները դուրս չէին եկել խաղահրապարակ՝ մնալով հանդերձարանում: Այդ կերպ «Միլուոկին» աջակցությունն էին հայտնել ԱՄՆ-ում նոր թափ հավաքած հակառասիստական շարժմանը, որը սկսվել էր ոստիկանի կողմից աֆրոամերիկացի Ջոյկոբ Բլեյքի վրա կրակոցներ արձակելուց հետո: 29-ամյա Բլեյքը ծանր վիճակում հիվանդանոցում է:

«Միլուոկիի» բասկետբոլիստների այդ քայլից հետո NBA-ը հետաձգել էր օրվա մյուս՝ «Օկլահոմա» - «Հյուսթոն» և «Լեյքերս» - «Պորտլենդ» խաղերը:

Հետևեք NEWS.am SPORT-ին Facebook-ում, Twitter և Telegram-ում