09:10  ,  14 օգոստոսի, 2020

Exclusive. Արմեն Մանուչարյան. «Ռոտոր» տեղափոխությունը շատ արագ ստացվեց (ֆոտո)

Երևանի «Փյունիկից» Վոլգոգրադի «Ռոտոր» տեղափոխված 25-ամյա պաշտպան Արմեն Մանուչարյանն արդեն սկսել է մարզումները ռուսական ակումբում:

NEWS.am Sport-ի թղթակցի հետ զրույցում Հայաստանի հավաքականի 25-ամյա ֆուտբոլիստը պատմել է իր տեղափոխության, Ռուսաստանի Պրեմյեր լիգայում խաղալու ցանկության ու ռուս գործակալ Դմիտրի Սելյուկի հետ համագործակցության մասին: Արմեն Մանուչարյանը 2016 թվականից էր հանդես գալիս «Փյունիկում», որի կազմում անցկացրել է 119 խաղ և դարձել 7 գոլի հեղինակ:

Արմեն, ունեիր կարիերադ արտասահմանում շարունակելու մի քանի տարբերակներ, բայց ընտրեցիր «Ռոտորը»: Ինչո՞վ է պայմանավորված այդ որոշումը:

Դա առաջին հերթին պայմանավորված էր նրանով, որ թիմի մարզիչը դիտել և հավանել էր իմ խաղը, այդ պատճառով ընտրեցի հենց այս տարբերակը: Այս մրցաշրջանում «Ռոտորը» խաղում է Ռուսաստանի Պրեմյեր լիգայում, և դա մեծ քայլ առաջ էր իմ կարիերայում:

Մյուս առաջարկները ո՞ր երկրներից էին:

Առաջարկներ կային Ղազախստանից: Իմ ծառայություններով հետաքրքրված էր նաև Ռուսաստանի Պրեմյեր լիգայում հանդես եկող ևս մեկ ակումբ, բայց «Ռոտորի» տարբերակն ամենահստակն էր:

Դու համագործակցո՞ւմ ես ռուս գործակալ Դմիտրի Սելյուկի հետ:

Այո, Դմիտրի Սելյուկն իմ գործակալն է: Տեղափոխությունս տեղի ունեցավ շատ արագ՝ մոտ 2 օրում: Գործակալս զանգեց և ասաց, որ կա հետաքրքրություն, իսկ 2 օր անց հայտնեց, որ պետք է ժամանեմ Ռուսաստան և միանամ թիմին:

Վաղո՞ւց ես աշխատում Դմիտրի Սելյուկի հետ:

Ոչ, համագործակցությունը սկսել ենք մոտ 1.5 ամիս առաջ:

Վերջին տարիներին դու «Փյունիկի» առանցքային խաղացողներից էիր և երբեմն կատարում էիր թիմի ավագի պարտականությունները: Ակումբը հե՞շտ բաց թողեց քեզ:

Ակումբը հեշտ բաց թողեց ինձ, ինչի համար շատ շնորհակալ եմ: Իմանալով, որ ունեմ առաջարկ արտասահմանից, նրանք ինձ ասացին, որ շատ կարևոր եմ թիմի համար, բայց թե՛ մարզիչը, թե՛ ակումբի անձնակազմը չխոչընդոտեցին իմ տեղափոխությանը: Եվ դա այն դեպքում, որ նրանք հասկանում էին, որ ստեղծված իրավիճակում ես շատ պետք էի թիմին, քանի որ կա խաղացողների պակաս:

Արդեն հասցրել ես մի քանի մարզում անցկացնել «Ռոտորում»: Մարզումային գործընթացը շա՞տ է տարբերվում հայաստանյան մարզումներից:

Ես դեռ 4 մարզման եմ մասնակցել, բայց, քանի որ խաղային օրացույցը շատ խիտ է, մարզումային գործընթացն ավելի շատ տակտիկական է: Մարզումային տարբերությունը մեծ է: Այստեղ ավելի շատ շեշտը դրվում է ֆիզիկական ու տակտիկական աշխատանքի վրա:

«Զենիթի» դեմ մեկնարկային տուրի խաղում դու փոխարինողների թվում էիր, բայց խաղաժամանակ չստացար: Արդեն լիովին պատրա՞ստ ես դաշտ դուրս գալ նոր թիմի կազմում:

Երևի, պատրաստ չէի մասնակցել այդ հանդիպմանը, քանի որ 1.5 օր առաջ էի միացել թիմին և իմ հայտավորվելը ստացվել էր ամենավերջին պահին: Մի քանի մարզում անցկացնելուց հետո գրեթե հարմարվել եմ թիմին և այս պահին պատրաստ եմ դուրս գալ խաղադաշտ:

Դու ունիվերսալ խաղացող ես և կարող ես հանդես գալ տարբեր դիրքերում: «Ռոտորում» ո՞ր խաղային դիրքում են դիտարկում քեզ:

Մարզիչն ինձ հարցրել է, թե որ դիրքերում կարող եմ հանդես գալ: Հավանաբար, կխաղամ աջ պաշտպանի դիրքում:

Իսկ ո՞րն է քո ամենաօպտիմալ խաղային դիրքը:

Ես ինձ ամենալավը զգում եմ աջ պաշտպանի դիրքում: Նաև 3 կենտրոնական պաշտպանով խաղալու դեպքում կնշեմ կենտրոնականի դիրքը:

Ռուսաստանի առաջնությունում խաղալն ու հարմարվելն այնքան էլ հեշտ չէ: Նախկինում ունեցե՞լ ես ուժերդ հենց այդ լիգայում փորձելու ցանկություն:

Իհարկե, ունեի նման ցանկություն: Ռուսաստանի Պրեմյեր լիգան ուժեղ առաջնություն է, լավագույններից մեկն աշխարհում: Հայաստանի Բարձրագույն խմբի հետ համեմատ Ռուսաստանի առաջնությունը շատ ավելի բարձրակարգ է խաղացողների խաղամակարդակի, ֆիզիկական աշխատանքի ու արագության առումով: Այստեղ հանդես են գալիս ուժեղ խաղացողներ և հաջող ելույթներ ունենալու համար պետք է շատ աշխատեմ, որպեսզի կարողանամ արդարացնել սպասելիքները:

Վոլգոդրադում կա հայկական մեծ համայնք: Հասցրե՞լ ես ծանոթանալ տեղի հայության հետ: Քաղաքից առաջին տպավորություններն ինչպիսի՞ն են:

Դեռ չեմ հասցրել դուրս գալ, քանի որ իմ տեղափոխությունը շատ արագ ստացվեց: Այս օրերին զբաղված էի առաջնությանը հայտավորվելու հետ կապված գործերով: Գիտեմ, որ քաղաքն ապրում է ֆուտբոլով: Առաջին հնարավորության դեպքում կծանոթանամ հայկական համայնքի հետ: Ինչպես գիտեք, կորոնավիրուսի համավարակի պատճառով երկրպագուների մուտքը ստադիոններ դեռ արգելվում է: Գիտեմ, որ Ռուսաստանի առաջին դիվիզիոնի խաղերի ժամանակ 30-35 հազար երկրպագու էր ներկա լինում «Ռոտորի» հանդիպումներին:

Դավիթ Եղիազարյան

Հետևեք NEWS.am SPORT-ին Facebook-ում, Twitter և Telegram-ում


  • Այս թեմայով