ՀՖՖ գործկոմի անդամ. Բարոյական չեմ համարում շարունակել գործունեությունս

Հայաստանի ֆուտբոլի ֆեդերացիայի գործադիր կոմիտեի անդամ, մրցավարական կոմիտեի նախագահ Տիգրան Հակոբյանը հրաժարական է տվել: Նա իր որոշումը բացատրել է պայմանավորված խաղերի սկանդալով:

«Հարգելի՛ գործընկերներ և ֆուտբոլային հասարակություն,

Հանդիսանալով գործադիր կոմիտեի անդամ, մրցավարական կոմիտեի նախագահ և, ընդգրկված լինելով պայմանավորված խաղերի կոմիտեի կազմում, հայտնում եմ ձեզ, որ, պայմանավորված վերջին զարգացումներով, բարոյական չեմ համարում շարունակել գործունեությունս, քանի որ ընտրություններին մասնակցել են ակումբներ, որոնց խաղերը եղել են պայմանավորված: Հետևաբար ընտրությունները համարում եմ ոչ լեգետիմ: Հատուկ կցանկանամ ընդգծել, որ իմ որոշումը չունի քաղաքական դրդապատճառներ: Համոզված եմ,որ որոշ շահագրգիռ շրջանակներ փորձելու են իմ անձը կապել քաղաքականության հետ: Ինձ բացառապես հետաքրքրում է ոլորտի զարգացումը»,- ֆեյսբուքյան էջում գրել է Տիգրան Հակոբյանը:

Գյումրիի «Շիրակը» ողջունել է Տիգրան Հակոբյանի քայլը.

«Ողջունում ենք Տիգրան Հակոբյանի քայլը՝ ուղղված հայկական ֆուտբոլում պայմանավորված խաղերի բացահայտմանը և հնարավոր բացասական հետևանքների վերացմանը։ Համոզված ենք, որ հայկական ֆուտբոլում ի հայտ եկած «ղումարը» կարիք ունի խորը և համապարփակ վերլուծության։ Եվ արդեն օրվա մարտահրավեր է դարձել առողջացան ուղղությամբ անհրաժեշտ միջոցառումների և որոշումների կայացման հարցը»,- նշված է «Շիրակի» մամուլի ծառայության հայտարարությունում:

Հետևեք NEWS.am SPORT-ին Facebook-ում, Twitter և Telegram-ում