Արտետա․ Գվարդիոլայի շնորհիվ եմ դարձել մարզիչ

Անգլիայի գավաթը նվաճած Լոնդոնի «Արսենալի» իսպանացի գլխավոր մարզիչ Միկել Արտետան շնորհակալություն է հայտնել «Մանչեսթեր Սիթիի» կատալոնացի գլխավոր մարզիչ Խոսեպ Գվարդիոլային, որի մարզչական շտաբում երեք տարի եղել է նրա օգնականը մինչեւ «Արսենալը» գլխավորելը։

«Պետք է շնորհակալություն հայտնեմ Պեպին, քանի որ նրա շնորհիվ եմ դարձել մարզիչ։ Եթե որեւէ մեկն ասեր, որ այս ամենին հասնելու եմ, չէի հավատա։ Բայց առավել հպարտ եմ այն մթնոլորտով, որը տիրում է «Արսենալի» հանդերձարանում»,- Արտետայի խոսքը մեջբերում է BT Sport-ը։

2016-ին «Արսենալում» ֆուտբոլիստի կարիերան ավարտելուց հետո Արտետան ընդգրկվել էր «Մանչեսթեր Սիթիում» Գվարդիոլայի մարզչական շտաբում։

2019թ․ դեկտեմբերին 38-ամյա մասնագետն ընդունեց «Արսենալի» հրավերը։ Անգլիայի գավաթն Արտետայի մարզչական կարիերայում առաջին տիտղոսն է գլխավոր մարզիչի դերում։

Հիշեցնենք, որ եզրափակիչում «Արսենալը» գաբոնցի հարձակվող Պյեր-Էմերիկ Օբամեյանգի դուբլի շնորհիվ 2։1 հաշվով պարտության է մատնել Լոնդոնի «Չելսիին»։

Հետևեք NEWS.am SPORT-ին Facebook-ում, Twitter և Telegram-ում