09:44  +04,  30 հուլիսի, 2020

Հովհաննես Բաչկով․ Պրոֆեսիոնալ ռինգ վաղուց էի ցանկանում տեղափոխվել, բայց գերնպատակը մնում է Օլիմպիական խաղերը

Բռնցքամարտի Հայաստանի հավաքականի ավագ, 64 կգ քաշային Հովհաննես Բաչկովը հանդես կգա պրոֆեսիոնալ ռինգում. բռնցքամարտիկը 3 տարվա պայմանագիր է կնքել անգլիական MTK Global (Mack The Knife Global) մենեջերական ընկերության հետ:

Հովհաննես Բաչկովը Տոկիոյի Օլիմպիական խաղերում Հաաստանի օլիմպիական հավաքականի հույսերից մեկն է, օլիմպիական մեդալ նրանից սպասում են բոլորը: Վերջին տարիներին Բաչկովը փայլուն է հանդես գալիս աշխարհի, Եվրոպայի առաջնություններում: 2017 թվականի Եվրոպայի առաջնությունում 7 տարվա դադարից հետո գյումրեցի բռնցքամարտիկը Հայաստանի համար նվաճեց Եվրոպայի չեմպիոնի տիտղոսը: Այդ նույն տարում աշխարհի առաջնությունում էլ նվաճեց բրոնզե մեդալ: 2019-ին Եվրոպական խաղերում նվաճեց ոսկե մեդալ եւ հռչակվեց Եվրոպայի կրկնակի չեմպիոն: 2019-ի աշխարհի առաջնությունում էլ կողմնակալ մրցավարության պատճառով արժանացավ բրոնզե մեդալի:

Գյումրեցի բռնցքամարտիկը Տոկիոյի Օլիմպիական խաղերի ուղեգիր դեռեւս չունի: Մարտի 14-24-ը Լոնդոնում անցկացված վարկանիշային մրցաշարում ռինգ դուրս գալու հնարավորություն չունեցավ, քանի որ կորոնավիրուսի պանդեմիայի պատճառով մեկնարկած մրցաշարը դադարեցվեց: Հայ բռնցքամարտիկն էլ Լոնդոնից վերադարձավ կորոնավիրուսով վարակված: 14-օրյա բուժում ստանալուց հետո Հայաստանի հավաքականի ավագը վերադարձավ մարզումներին եւ այժմ պատրաստվում է ուժերը փորձել պրոֆեսիոնալ ռինգում, զուգահեռաբար կպայքարի նաեւ իր համար այդքան բաղձալի օլիմպիական ուղեգրի եւ մեդալի համար:

NEWS.am Sport-ի թղթակիցը զրուցել է Բաչկովի հետ։

Հովհաննես, շնորհավորում եմ MTK Global ընկերության հետ պայմանագիր կնքելու կապակցությամբ: Ինչպե՞ս որոշեցիր տեղափոխվել պրոֆեսիոնալ ռինգ Օլիմպիական խաղերի շեմին:

Պրոֆեսիոնալ ռինգ վաղուց էի ցանկանում տեղափոխվել, բայց սպասում էի Տոկիոյի Օլիմպիական խաղերին: Քանի որ մեկ տարով հետաձգվեցին Խաղերը, որոշեցի պրոֆեսիոնալ ռինգ տեղափոխվելս չհետաձգել: Բացի այդ, ժամանակն է տեղափոխվելու, որպեսզի տարիքիս հետ կապված հետագայում արդեն ուշ չլինի:

Երբ առաջարկը ստացա, խորհրդակցեցի մարզիչներիս, ընտանիքիս անդամների հետ, բայց որոշումս կայացրեցի «գիր ու ղուշով» (ծիծաղում է):

Այսինքն՝ սիրողական բռնցքամարտից չես հեռանո՞ւմ, Օլիմպիական խաղերի համար պայքարդ շարունակվելո՞ւ է:

Այո, ես չեմ հեռանում սիրողական ռինգից, շարունակելու եմ պայքարս Տոկիոյի Օլիմպիական խաղերի ուղեգրի, ապա նաեւ օլիմպիական մեդալի համար: Այդ պատճառով որոշում է կայացվել, որ օգտագործելով այս մեկ տարին, մինչեւ Օլիմպիական խաղեր 1-2 մենամարտ անցկացնել, զուգահեռ նաեւ զբաղվել սիրողականով, մասնակցել սիրողական բռնցքամարտի մրցաշարերին:

Ե՞րբ է նախատեսվում առաջին մենամարտդ:

Առաջին մենամարտս հնարավոր է տեղի ունենա սեպտեմբերին Դուբայում, եթե հասցնեմ փաստաթղթային եւ մի քանի այլ հարցեր լուծել: Ցանկանում եմ՝ հենց սեպտեմբերից էլ մեկնարկել: Ամեն ինչ կանեմ, որպեսզի բոլոր հարցերը մինչ այդ լուծվեն:

Ինչո՞ւ հենց MTK Global ընկերություն: Ո՞ւմ կողմից եղավ առաջարկը եւ քանի՞ տարով ես կնքել պայմանագիրդ:

Սա աշխարհի մեծագույն մենեջերական ընկերություններից է, եթե ոչ ամենամեծը: Կենտրոնը Դուբայում է, աշխարհահռչակ գործակալություն է, բռնցքամարտի աշխարհում շատ հայտնի: Այս ընկերությունը բազմաթիվ չեմպիոններ է տվել եւ ունի տասնյակ հազարավոր հետեւորդներ: Առաջարկը եղել է նրանց կողմից: Ամեն մրցաշարից հետո ինձ պարբերաբար մոտեցել են պրոմոութերներ, մենեջերներ եւ պրոֆեսիոնալ ռինգում հանդես գալու առաջարկներ արել: Սա այն առաջարկություններից էր, որն ինձ դուր եկավ թե՛ պայմաններով, թե՛ ֆինանսական առումով: Պայմաններից առաջնայինն ու ինձ համար կարեւորն այն էր, որ ես հնարավորություն կունենամ համատեղել սիրողականն ու պրոֆեսիոնալը: Մինչեւ Օլիմպիական խաղեր ինձ չեն խանգարի:

Քանի որ ամեն մի մենեջերական, պրոմոութերական ընկերություն չէ, որ համաձայնվում է համատեղումով պայմանագիր կնքել, իսկ այս պարագայում նրանք համաձայն են, որ ես կարողանամ պատշաճ հանդես գալ Խաղերում, որոշեցի ընդունել առաջարկն ու կնքել պայմանագիրը: Այն 3 տարով է, բայց կան բացառություններ. եթե թոփ-15-ի մեջ մտնեմ, մեխանիկորեն եւս երկու տարով պայմանագիրս կերկարաձգվի:

Հետագայում արդեն պրոմոութերական ընկերության հետ պայմանագիր կկնքեմ: Իսկ մինչ այդ  MTK Global-ն, ըստ մեր պայմանագրի, ինձ համար երկու մենամարտ կնշանակի:

Օլիմպիական խաղերի նախապատրաստական փուլում պրոֆեսիոնալ մենամարտերդ չեն խանգարի՞:

Ինձ համար այս պահին գերնպատակը Օլիմպիական խաղերն են: Մեր պայմանագրի ամենագլխավոր ու առաջնային կետը եղել է հենց դա, որ ինձ չպետք է խանգարեն՝ պատրաստվել Օլիմպիական խաղերին: Քանի որ համաշխարհային սպորտում, այդ թվում եւ մեր մարզաձեւում, առաջիկայում մրցաշարեր չկան, ամեն ինչ անորոշ է կորոնավիրուսի պատճառով, ձեռնունայն չնստելու համար որոշեցի երկու մենամարտ մինչեւ Օլիմպիական խաղերն անցկացնել: Այս միջոցով նախ զուր տարի չեմ կորցնի, նաեւ ֆինանսապես խնդիրներ չեմ ունենա:

Տոկիոն կլինի քո սիրողական ռինգում կարիերայիդ ավա՞րտ:

Չեմ կարող ասել, գուցե: Ամեն ինչ կախված է Օլիմպիական խաղերի արդյունքից: Ես մեծ նպատակներ ունեի սիրողական ռինգում, կուզեի աշխարհի չեմպիոն էլ դառնալ, բայց չստացվեց: Եթե իմ ուզած արդյունքով մասնակցեցի Խաղերին, այսինքն՝ մեդալով, գուցե հետագայում փորձեմ նաեւ համատեղության կարգով ամեն դեպքում գնալ նաեւ սիրողական բռնցքամարտում աշխարհի չեմպիոնության հետեւից: Այս պահին չեմ կարող ասել՝ ինչպես ամեն ինչ կդասավորվի ինձ համար:

Կարոտե՞լ ես ռինգը:

Շատ... Վերջին մենամարտս եղել է 2019 թվականի աշխարհի առաջնությունը:

Լուսինե Շահբազյան

Ֆոտո՝ mtkglobal.com-ից

Հետևեք NEWS.am SPORT-ին Facebook-ում և Twitter-ում


Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

  • Այս թեմայով


  • Հարցում
Քվեարկել են (13)
  • Ֆեյսբուք
  • NEWS.am Sport Exclusive
  • Արխիվ