14:38  +04,  22 մայիսի, 2020

Մարզաշխարհը բախվել է բազմաթիվ խնդիրների․ քննարկում ԱԺ-ում

Ազգային ժողովի գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովում կորոնավիրուսի տարածման հետեւանքով մարզաշխարհում ստեղծված իրավիճակի վերաբերյալ քննարկում տեղի ունեցավ, որը վարում էր պատգամավոր, օլիմպիական փոխչեմպիոն Արսեն Ջուլֆալակյանը:

Քննարկմանը մասնակցում էին Երեւանի տարբեր վարչական շրջանների պետական մարզադպրոցների տնօրեններ, փոխտնօրեններ, ֆեդերացիաների ներկայացուցիչներ: Արսեն Ջուլֆալակյանը նշեց, որ քննարկմանը պետք է մասնակցեր նաեւ ԿԳՄՍ նախարար Արայիկ Հարությունյանը, բայց նա գտնվում է Արցախում եւ չի հասցրել վերադառնալ:  

«Ուզում ենք հասկանալ, թե մարզադպրոցներն ինչ խնդիրներ ունեն կորոնավիրուսի պանդեմիայով պայմանավորված: Պարետատան կողմից պարբերաբար ունենում ենք կարգավորումներ, որոնք շատերը հասկանում են, շատերը ոչ: Այս քննարկման նպատակն է հասկանալ, թե ինչ խնդիրների առաջ է կանգնած մարզաշխարհը պարետատան սահմանափակումներից հետո»,- ասաց Արսեն Ջուլֆալակյանը:

Երեւանի Կենտրոն վարչական շրջանի մարզադպրոցներից մեկի տնօրեն Բելլա Ղազարյանի խոսքով, մարզադպրոցը պարետատան պահանջով չի աշխատում, ինչի հետեւանքով տուժում են տարբեր մարզաձեւեր:

«Պարետի որոշմամբ՝ դեռ չենք աշխատում, փակ է դպրոցը: Կորոնավիրուսի պատճառով մարզաձեւերում խնդիր է առաջացել: Միայն գեղարվեստական մարմնամարզությունից մեզ մոտ մարզվում է 200-ից ավելի երեխա: Փորձում ենք մարզումները կազմակերպել հանրակրթական դպրոցի դահլիճներում, որտեղ մինչեւ 30 երեխա է կարողանում մարզվել: Մարզաձեւը տուժում է: Ծնողների հետ մշտական կապի մեջ ենք: Նրանց մեծ մասը չի ցանկանում այլեւս բերել մարզումների երեխաներին մինչեւ արտակարգ դրության ավարտը: Հեռավորությունը կարողանում ենք պահպանել, բայց գործիքներով են երեխաները աշխատում եւ դրանք ախտահանելու խնդիր կա: Ախտահանման նյութերի կարիք ունենք»,- ասաց Բելլա Ղազարյանը:

Շենգավիթ համալիր մարզաձեւերի մանկապատանեկան մարզադպրոցի տնօրեն Դավիթ Ֆահրադյանը ֆինանսական աջակցության խնդիր բարձրացրեց՝ նշելով, որ մարզադպրոցները դժվարությամբ են կարողանում ապահովել ախտահանիչ նյութերը:

«Մենք փորձել ենք ընդգրկել հավաքական թիմերը: Հրամանը եղավ, որ կարող են մարզիկները վերսկսել մարզումները: Բայց միջոցների խնդիր ունենք, որոնք բավական թանկ են՝ ալկոգել, ախտահանիչ նյութեր, ջերմաչափման սարքեր: Մենք չենք կարողանում մեր միջոցներով ապահովել դրանք: Ամսական մեծ գումար է կազմում, բայց մեր միջոցներով դեռ չենք կարողանում անել: Եթե պետական աջակցություն ունենանք, կարող ենք նաեւ օգնել այն մարզադպրոցներին, որոնք իրենց մարզումները կազմակերպում են հանրակրթական դպրոցների դահլիճներում:

Կա եւս մեկ խնդիր՝ մարզադպրոցների պահակների հետ կապված, որոնք հրաժարվում են գալ աշխատանքի, քանի որ ռիսկային գոտում են: Իսկ եթե պահակները չլինեն, մարզադպրոցներն ովքեր պետք է պահպանեն: Այս խնդիրը եւս պետք է կարգավորվի»,- նշեց Դավիթ Ֆահրադյանը:

Հայաստանի ձյուդոյի ֆեդերացիայի փոխնախագահ, Երեւանի «Օլիմպավանի» տնօրեն Թաթուլ Հովհաննիսյանի խոսքով՝ հայ մարզիկները, ազգային հավաքականները հետ են ընկնում նախաօլիմպիական ծրագրից, քանի որ մասնավորապես կոնտակտային մարզաձեւերում մարզումներ չեն անցկացվում:

«Կոնտակտային մարզաձեւերը, օրինակ՝ ձյուդոն, շատ վատ վիճակում է: Պարետատան թույլտվությամբ, կարող են մեր պրոֆեսիոնալ մարզիկները մարզվել: Հավաքականի բոլոր մարզիչները աշխատում են դպրոցների հետ, բայց ոչ լիարժեք: Մենք չունենք հնարավորություն մարզադահլիճում աշխատել: Մեր հավաքականի տղաներն այնքան ուժային են արել, որ ոչ տատամին են զգում, ոչ մրցակցին»,- նկատեց Թաթուլ Հովհաննիսյանը:

ԱԺ պատգամավոր Արսեն Ջուլֆալակյանը ըմբշամարտի եւ կոնտակտային մարզաձեւերի համար առաջարկում է մարզիկներին 15-20 հոգանոց խմբերով բոլորին թեստավորել, բացասական պատասխաններից հետո մեկուսացնել տարբեր մարզաբազաներում կամ հյուրանոցներում, որտեղ կան ֆիթնես դահլիճներ, որպեսզի նրանք չունենան որեւէ շփում, կոնտակտ:

«Այս առաջարկը ես արել եմ նաեւ միջազգային կոնֆերանսների ժամանակ. խոսքը ազգային հավաքականների մասին է: Պետք է քննարկվի, փորձենք կիրառել, որպեսզի մեր հավաքական թիմերը չտուժեն կորոնավիրուսի պատճառով եւ հետ չընկնեն իրենց մարզումներից: Պարետատնից կամ կառավարությունից լրացուցիչ գումարներ պետք չի այս ծրագիրն իրականացնելու համար, քանի որ մարզական ֆեդերացիաները տարեսկզբին ստացել են կառավարությունից իրենց նախատեսված ֆինանսավորումը եւ չեն կարողանում այդ ֆինանսները օգտագործել»,- ասաց պատգամավորը:

Թաթուլ Հովհաննիսյանը Արսեն Ջուլֆալակյանին առաջարկեց մենապայքարային մարզաձեւերի հավաքականներին մեկուսացնել Օլիմպավանում, որտեղ կան բոլոր պայմանները մարզիկներին կորոնավիրուսից պաշտպանելու համար:

Քննարկվեց նաեւ պարետի որոշումը պրոֆեսիոնալ մարզիկների վերաբերյալ: Մասնակիցները նշեցին, որ պարետ Տիգրան Ավինյանի որոշման մեջ անճշտություն կա պրոֆեսիոնալ մարզիկների մասին: Շատ հավաքականներ չեն կարողանում վերսկսել մարզումները պետական մարզադպրոցներում, քանի որ ըստ օրենքի հավաքականների անդամները պրոֆեսիոնալ մարզիկներ չեն համարվում եւ մարզադպրոցները չեն համաձայնվում թույլ տալ հավաքականներին մտնել դահլիճ մարզումների:

Ազգային ժողովի գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովը ԿԳՄՍ-ի հետ կքննարկի եւ պարետատանը կառաջարկի մարզաձեւերն առանձնացնել տարբեր համայնքների մարզադպրոցներում, որպեսզի հավաքական թիմերը եւ տվյալ մարզաձեւերի մարզիկները կարողանան կազմակերպել մարզադահլիճային մարզումները:

Արսեն Ջուլֆալակյանը տեղեկացրեց, որ մայիսի 25-ին ժամը 12-ին ԱԺ-ում կհրավիրվի եւս մեկ քննարկում Սմբատ Գոգյանի հրաժարականի վերաբերյալ, որին ներկա կլինեն ԲՈԿ նախագահ Սմբատ Գոգյանը եւ ԿԳՄՍ տեղակալ Գրիշա Թամրազյանը:

Լուսինե Շահբազյան

Հետևեք NEWS.am SPORT-ին Facebook-ում և Twitter-ում


Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

  • Հարցում
Քվեարկել են (12)
  • Ֆեյսբուք
  • NEWS.am Sport Exclusive
  • Արխիվ