03:49  +04,  14 փետրվարի, 2020

Արայիկ Բաղդադյան․ Մարզչական խորհուրդի որոշումը կլինի վերջնական 77 կգ քաշի օլիմպիական ուղեգրի հարցում

Մարզչական խորհուրդը ինչ որոշում կայացնի 77 կգ քաշի օլիմպիական ուղեգրի հետ կապված, դա էլ կլինի վերջնական որոշումը:

Այս մասին NEWS.am Sport-ի թղթակցի հետ զրույցում ասաց Հայաստանի ըմբշամարտի ֆեդերացիայի գլխավոր քարտուղար Արայիկ Բաղդադյանը:

Եվրոպայի առաջնությունից առաջ ֆեդերացիայի ղեկավարությունը հայտնել էր, որ 77 կգ քաշային կարգում Տոկիո-2020-ի մասնակցին կհայտարարեն առաջնությունից հետո:

«Կա մարզչական խորհուրդ, մարզիչները դեռ նոր են վերադարձել: Ինչ որոշում կայացնի մարզչական խորհուրդը, դա էլ կլինի վերջնական լուծումը: Բայց այս պահին դեռ Հայաստան չի վերադարձել Գեւորգ Ալեքսանյանը: Մարզիչները կորոշեն եւ ֆեդերացիան այն կընդունի որպես վերջնական որոշում»,- ասաց Արայիկ Բաղդադյանը:

ՀԸՖ գլխավոր քարտուղարն ամփոփեց նաեւ Եվրոպայի առաջնությունը:

«Ուզում եմ նախ շնորհավորել Արթուր Ալեքսանյանին 5-րդ ոսկու կապակցությամբ: Հպարտանում ենք նրանով: Նրանից սպասում ենք երկրորդ օլիմպիական ոսկին: Գեւորգ Ղարիբյանը շատ լավ հանդես եկավ, բոլորիս ուրախացրեց: Հրաշալի գոտեմարտեր անցկացրեց կիսաեզրափակիչում ադրբեջանցու հետ եւ եզրափակիչում թուրք ըմբիշի հետ: Կարեն Ասլանյանը նույնպես շատ լավ մասնակցեց: Կիսաեզրափակիչում ոչ բացահայտ մրցավարական միջամտություն եղավ: Մենք բողոքարկեցինք: Այդ գոտեմարտի 3 մրցավարներն էլ որակազրկվեցին, ինչը կազդի Օլիմպիական խաղերում մրցավարական կազմում ընդգրկվելու վրա: Չալյանն էլ վատ չմասնակցեց: Նա պարտավոր էր ադրբեջանցի ըմբիշին հաղթել»,- ասաց Արայիկ Բաղդադյանը:

Հիշեցնենք, որ Էդուարդ Սահակյանի գլխավորած թիմը Իտալիայի մայրաքաղաք Հռոմում տեղի ունեցած Եվրոպայի առաջնությունում նվաճեց 4 մեդալ՝ երկու ոսկի, երկու բրոնզ: Ոսկե մեդալներ նվաճեցին 97 կգ քաշային կարգում օլիմպիական չեմպիոն Արթուր Ալեքսանյանն ու 60 կգ քաշային Գեւորգ Ղարիբյանը: Բրոնզե մեդալակիրներ դարձան 77 կգ քաշային Կարապետ Չալյանն ու Կարեն Ասլանյանը:

Լուսինե Շահբազյան

Հետևեք NEWS.am SPORT-ին Facebook-ում և Twitter-ում


Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

  • Լրահոս
  • Հարցում
Քվեարկել են (12)
  • Ֆեյսբուք
  • NEWS.am Sport Exclusive
  • Արխիվ