ԵԱ. Արթուր Ալեքսանյանը գեղեցիկ հաղթանակով դուրս եկավ եզրափակիչ

Օլիմպիական չեմպիոն Արթուր Ալեքսանյանը գեղեցիկ հաղթանակով նվաճեց Իտալիայի մայրաքաղաք Հռոմում ընթացող հունահռոմեական ըմբշամարտի Եվրոպայի առաջնության եզրափակիչի ուղեգիր եւ կպայքարի ոսկե մեդալի համար:

97 կգ քաշայինների կիսաեզրափակիչում Ալեքսանյանը 8:1 հաշվով հաղթեց Եվրոպայի բրոնզե մեդալակիր, Ֆինլանդիայի ներկայացուցիչ Մատի Էլիաս Կուոսմանենին:

Օլիմպիական չեմպիոնը փետրվարի 12-ին կփորձի նվաճել իր մարզական կարիերայի Եվրոպայի 5-րդ ոսկե մեդալը: Արթուր Ալեքսանյանի մրցակիցը եզրափակիչում կլինի Իտալիան ներկայացնող Նիկոլոս Կախելաշվիլին:

Օլիմպիական չեմպիոնը պայքարը սկսել էր 1/8 եզրափակիչից, որտեղ 7:1 հաշվով հաղթել էր թուրք Ջենք Իլդեմին, քառորդ եզրափակիչում 9:0 հաշվով վստահ հաղթանակ էր տարել բուլղարացի Կիրիլ Միլովի նկատմամբ:

Հիշեցնենք, որ Եվրոպայի առաջնության եզրափակիչ է դուրս եկել նաեւ 60 կգ քաշային կարգում Հայաստանի ներկայացուցիչ Գեւորգ Ղարիբյանը: Կիսաեզրափակիչում Ղարիբյանը 8:0 հաշվով ժամանակից շուտ հաղթեց էստոնացի Հիլարի Մայգիսալուին: Ղարիբյանը Եվրոպայի ոսկե մեդալը կվիճարկի թուրք Կերեմ Կամալի հետ:

Փետրվարի 11-ին տեղի կունենա առաջին մրցումային օրվա եզրափակիչները: 77 կգ քաշայինների բրոնզե մեդալի համար պայքարում մրցագորգ դուրս կգա Եվրոպական խաղերի փոխչեմպիոն, Եվրոպայի բրոնզե մեդալակիր Կարապետ Չալյանը: Հիշեցնենք, որ հայ ըմբիշը փետրվարի 10-ին կիսաեզրափակիչում 0:3 հաշվով պարտվել էր ադրբեջանցի Սանան Սուլեյմանովին: Բրոնզե մեդալի համար պայքարում Չալյանի մրցակիցը կլինի կրկնակի օլիմպիական չեմպիոն Արմեն Նազարյանի սանը՝ բուլղարիան ներկայացնող հայազգի Հայկ Մնացակայնանը:

Հետևեք NEWS.am SPORT-ին Facebook-ում, Twitter և Telegram-ում