Ծանրամարտի միջազգային ֆեդերացիայի նախագահը 90 օրով հրաժարվել է լիազորություններից

Հունգարացի Տամաշ Այանը 90 օրով ինքնակամ դադարեցրել է լիազորությունները Ծանրամարտի միջազգային ֆեդերացիայի նախագահի պաշտոնում կոռուպցիայի վերաբերյալ մեղադրանքների պատճառով։

Միջազգային ֆեդերացիայի գործադիր կոմիտեն Քաթարի մայրաքաղաք Դոհայում տեղի ունեցած արտահերթ նիստում ժամանակավոր նախագահ է նշանակել ԱՄՆ-ի ծանրամարտի ֆեդերացիայի ներկայացուցիչ, միջազգային ֆեդերացիայի փոխնախագահ Ուրսուլա Պապանդրեային։ Ստեղծվել է հնարավոր կոռուպցիոն սխեմաների հետաքննության հանձնախումբ, հայտնում է կազմակերպության կայքը։

Նման զարգացումների պատճառը եղել է գերմանական ARD հեռուստաալիքի պատրաստած ֆիլմը, որում Ծանրամարտի միջազգային ֆեդերացիան ու Տամաշ Այանը մեղադրվել են «կոռուպցիայի մշակույթ» ստեղծելու եւ դոպինգի քողարկման մեջ։ Փաստեր են ներկայացվել, որ միջազգային ֆեդերացիան Միջազգային օլիմպիական կոմիտեից ստացած մոտ 5 միլիոն դոլարը փոխանցել է բացառապես Այանի վերահսկողության տակ գտնվող բանկային հաշիվների Շվեյցարիայում։

Ֆեդերացիան հետաքննության մասին զեկույցը կներկայացնի մարտի 11-13-ին Բուխարեստում։

Տամաշ Այանը 1975-2000 թվականներին եղել է միջազգային ֆեդերացիայի գլխավոր քարտուղարը, 2000 թվականից նախագահն է։

Հետևեք NEWS.am SPORT-ին Facebook-ում, Twitter և Telegram-ում