ԵԱ. Հակոբ Մկրտչյանը՝ Մ23 չեմպիոն եւ ռեկորդակիր, Դավիթ Հովհաննիսյանը՝ բրոնզե մեդալակիր (ֆոտո)

Ռումինիայի մայրաքաղաք Բուխարեստում ընթացող ծանրամարտի տղամարդկանց Եվրոպայի մինչեւ 23 տարեկանների առաջնությունում Հակոբ Մկրտչյանը հռչակվեց չեմպիոն՝ երկամարտի 375 կգ արդյունքով եւ սահմանեց Եվրոպայի ռեկորդ հրում վարժությունում՝ 210 կգ-ով եւ ընդհանուր երկամարտի արդյունքով:

Դավիթ Հովհաննիսյանը երկամարտի 357 կգ արդյունքով բրոնզե մեդալակիր է: Այս քաշային կարգում 363 կգ երկամարտի արդյունքով արծաթե մեդալակիր դարձավ վրացի Ռեւազ Դավիթաձեն:

Հակոբ Մկրտչյանը առաջին մոտեցմամբ պոկեց 160 կգ-ը: Երկրորդ մոտեցման համար աշխարհի չեմպիոնը պավիրեց 165 կգ, որը եւս հաջողությամբ կատարեց: Երրորդ մոտեցման համար Հայաստանի մարզչական շտաբը պատվիրեց 170 կգ, բայց քիչ անց քաշը փոխեց 167 կգ, սակայն Հակոբ Մկրտչյանը չկարողացավ 167 կգ-ը պոկել եւ վարժությունն ավարտեց 165 կգ-ով՝ նվաճելով փոքր արծաթե մեդալ:

Հրում վարժությունը աշխարհի չեմպիոնը սկսեց 195 կգ-ով: Երկրորդ մոտեցման համար պատվիրեց միանգամից 200 կգ եւ ծանրաձողը պահեց գլխավերեւում՝ հռչակվելով չեմպիոն: Երրորդ մոտեցման համար Մկրտչյանը պատվիրեց 210 կգ-ով՝ փորձելով գերազանցել Եվրոպայի մինչեւ 23 տարեկանների ռեկորդն այս վարժությունում: Աշխարհի չեմպիոնը 210 կգ-ն էլ հրեց եւ սահմանեց Եվրոպայի ռեկորդ հրում վարժությունում եւ երկամարտում:

Դավիթ Հովհաննիսյանը պոկում վարժությունը սկսեց 155 կգ-ով եւ փայլուն կատարեց մոտեցումը: Երկրորդ մոտեցման համար Հովհաննիսյանը պատվիրել էր 161 կգ, սակայն չկարողացավ բարձրացնել: Երրորդ մոտեցմանը Եվրոպայի բրոնզե մեդալակիրը գլխավերեւում պահեց 161 կգ-ը եւ նվաճեց փոքր բրոնզե մեդալ:

Հրում վարժության համար նախնական պատվիրվել էր 195 կգ, սակայն Դավիթ Հովհաննիսյանը պայքարը սկսեց 185 կգ-ով եւ պահեց գլխավերեւում: Երկրորդ մոտեցմանը Եվրոպայի բրոնզե մեդալակիրը գլխավերեւում պահեց նաեւ 194 կգ-ը:

Հայ ծանրորդների հետ չեմպիոնի կոչման համար հավասար պայքար էր տանում Վրաստանի ներկայացուցիչ, աշխարհի բրոնզե, Եվրոպայի արծաթե մեդալակիր Ռեւազ Դավիթաձեն: 168 կգ-ով Դավիթաձեն փոքր ոսկե մեդալ նվաճեց պոկում վարժությունում, հրեց 195 կգ: Հրում վարժությունում Հակոբ Մկրտչյանը նվաճեց նաեւ փոքր ոսկե մեդալ, իսկ Դավիդ Հովհաննիսյանը՝ փոքր արծաթե մեդալ:

Եվրոպայի մինչեւ 23 տարեկանների առաջնությունը օլիմպիական վարկանիշային է:

Հետևեք NEWS.am SPORT-ին Facebook-ում, Twitter և Telegram-ում