Չեմպիոնների լիգայի գավաթակիր, Անգլիայի փոխչեմպիոն «Լիվերպուլի» բրազիլացի դարպասապահ Ալիսոն Բեքերը խոսել է կատալոնական «Բարսելոնայի» գերմանացի դարպասապահ Մարկ-Անդրե տեր Շտեգենի և «Մանչեսթեր Սիթիի» բրազիլացի դարպասապահ Էդերսոնի մասին:
«Տեր Շտեգենն ու Էդերսոնն, անկասկած, աշխարհի լավագույն դարպասապահների թվում են: Նրանք օգնել են իրենց ակումբներին մեծ հաջողությունների հասնել:
Կցանկանայի Էդերսոնի պես հեռահար փոխանցումներ կատարել, իսկ Տեր Շտեգենի ոտքերով խաղն ինձ պարզապես հիացնում է: Աշխարհում շատ քիչ դարպասապահներ կան, որ կարողանում են ոտքերով սեյվեր կատարել: Իհարկե, կցանկանայի այդ հատկությամբ նման լինել Տեր Շտեգենին»,- Ալիսոնի խոսքը մեջբերում է ՖԻՖԱ-ի մամուլի ծառայությունը:
Հիշեցնենք, որ Ալիսոն Բեքերը ՖԻՖԱ-ի վարկածով ճանաչվել է 2019 թվականի լավագույն դարպասապահ:
Հետևեք NEWS.am SPORT-ին Facebook-ում, Twitter և Telegram-ում