Իսպանիայի չեմպիոն «Բարսելոնայի» առաջատար, ՖԻՖԱ-ի վարկածով 2019 թվականին աշխարհի լավագույն ֆուտբոլիստ Լիոնել Մեսին իսպանական RAC1-ին տված հարցազրույցում անդրադարձել է վերջին ամիսներին մամուլում և երկրպագուների շրջանում ամենաքննարկվող թեմաներին: 32-ամյա հարձակվողը ևս մեկ անգամ ընդգծել է, որ չի պատրաստվում հեռանալ «Բարսելոնայից»:
«Կարիերաս ավարտելու եմ «Բարսելոնայում»»
«Ցանկանում եմ դեռ երկար տարիներ անցկացնել «Բարսելոնայում»: Ես միշտ հայտարարել եմ, որ իմ նպատակն է ֆուտբոլիստի կարիերաս ավարտել հենց այս ակումբում: Այդպես է ցանկանում նաև իմ ընտանիքը: Իմ կինն ու որդիներն իրենց շատ լավ են զգում Բարսելոնայում, և ես չեմ ցանկանում նրանց զրկել այն ընկերներից ու բարեկամներից, որոնց նրանք ձեռք են բերել այստեղ:
«Նյուելս Օլդ Բոյս»
«Այս ակումբում ես կատարել եմ իմ առաջին ֆուտբոլային քայլերը: Կար ժամանակ, երբ մտածում էի, որ հետաքրքիր կլինի կարիերան ավարտել այնտեղ, որտեղ սկսել եմ, սակայն հիմա շատ բան է փոխվել: Իմ կյանքի այս փուլում ես ճիշտ չեմ համարում Արգենտինա վերադառնալը»:
Նոր պայմանագիր «Բարսելոնայի» հետ
«Մտահոգվելու որևէ առիթ չկա: Ես պարբերաբար հանդիպում եմ ակումբի նախագահ Խոսեպ Մարիա Բարտոմեուի հետ, սակայն նոր պայմանագրի վերաբերյալ բանակցություններում մենք չենք շտապում»:
«Բարտոմեուի հետ հարաբերությունները հրաշալի են»
«Ես շատ լավ հարաբերություններ ունեմ ակումբի նախագահի հետ: Մենք հաճախ ենք հանդիպում և տարբեր հարցեր քննարկում կապված ակումբի զարգացման հետ:
Բարտոմեուն տրանսֆերներ իրականացնելիս` երբեմն խորհրդակցում է ինձ հետ, սակայն ցանկանում եմ ընդգծել, որ ակումբում որոշումներ ընդունում է ղեկավարությունը: Ես երբեք ֆուտբոլիստ ձեռք բերելու կամ գլխավոր մարզիչին հեռացնելու հարցով չեմ դիմել ակումբի ղեկավարությանը և չունեմ այդ իրավունքը»:
«Իմ լավագույն մարզավիճակում չեմ»
«Մրցաշրջանի մեկնարկը հաջող չստացվեց ինձ համար: Ես 2 անգամ վնասվածք ստացա և ստիպված եղա երկար ժամանակով բացակայել խաղադաշտից:
Հիմա ինձ լավ եմ զգում, սակայն դեռ հեռու եմ իմ լավագույն մարզավիճակից»:
«Գրիզմանի հետ խնդիրներ չունեմ»
«Գրիզմանը դեռևս չի ընդգրկվել «Բարսելոնայի» խաղային համակարգում: Նրան ժամանակ է հարկավոր իր լավագույն մարզավիճակին հասնելու համար:
Իհարկե, նա աշխարհի լավագույն ֆուտբոլիստներից մեկն է, իսկ լավագույնները միշտ տեղ ունեն «Բարսելոնայում»:
Ես մեծ ուրախությամբ եմ ընդունել Գրիզմանի տեղափոխության մասին լուրը և շատ լավ հարաբերություններ ունեմ նրա հետ»:
«Նեյմարը ցանկանում էր վերադառնալ»
«Նեյմարը ցանկանում էր վերադառնալ «Բարսելոնա», իսկ ակումբն ամեն ինչ արեց նրա վերադարձը կազմակերպելու համար, սակայն ես գիտեմ, թե որքան բարդ է ՊՍԺ-ի ղեկավարության հետ բանակցելը:
Խոսել եմ Նեյմարի հետ և կարող եմ ասել, որ նա ցանկանում էր ամեն գնով հեռանալ ՊՍԺ-ից: Կարծում էի, որ եթե «Բարսելոնային» չհաջողվի համաձայնության գալ ՊՍԺ-ի հետ, ապա Նեյմարը կհամաձայնվի տեղափոխվել «Ռեալ Մադրիդ»:
Չեմպիոնների լիգայում հաղթելը՝ գլխավոր նպատակ
«Մենք չենք կարողանում մոռանալ «Լիվերպուլից» կրած պարտությունը: Այդ ձախողումը շատ մեծ հարված էր թիմին, սակայն կարծում եմ, որ «Բարսելոնան» անհրաժեշտ դասեր քաղել է այդ պարտությունից:
Չեմպիոնների լիգայում հաղթելն իմ գլխավոր նպատակն է այս մրցաշրջանում: Ես երկար ժամանակ է, ինչ իմ գլխավերևում չեմ պահել Չեմպիոնների լիգայի գավաթը և հուսով եմ, այս մրցաշրջանում մենք կհասնենք այդ հաղթանակին»:
Չավին՝ «Բարսելոնայի» գլխավոր մարզի՞չ
«Չավին պատրաստվում է վերադառնալ, դա փաստ է: Չգիտեմ՝ երբ Չավին ստանձնի «Բարսելոնայի» գլխավոր մարզիչի պաշտոնը, ես դեռ կլինեմ խաղադաշտում, թե ոչ, բայց Չավիի վերադարձը յուրահատուկ կլինի ինձ համար:
Չավին «Բարսելոնայի» փիլիսոփայության կրողն է, և ես վստահ եմ, որ նա մեծ հաջողությունների կհասնի»:
«Մենք կանգնած ենք Վալվերդեի կողքին»
«Ակումբի բոլոր ֆուտբոլիստները վստահում են Վալվերդեին և կանգած են նրա կողքին: Վալվերդեն մեծ աշխատանք է կատարում և բոլորից շատ է ցանկանում գավաթներ նվաճել:
Եթե թիմը չի հաղթում, ապա դրա համար հավասար պատասխանատվություն են կրում բոլորը»:
Դեմբելեի կարմիր քարտը՝ «Սևիլիայի» հետ խաղում
«Դեմբելեն դժվարությամբ է խոսում իսպաներեն, և Մատեո Լաոսը նրան հեռացրեց խաղադաշտից, քանի որ չէր հասկացել՝ ինչ նկատի ունի Դեմբելեն: Այնուամենայնիվ, նա որակազրկվել է, և ես ցավում եմ, որ առաջիկա կարևոր հանդիպումներում Դեմբելեն չի կարողանա օգտակար լինել թիմին»:
«Կարոտում եմ Ռոնալդուին»
«Կցանկանայի, որպեսզի Ռոնալդուն չհեռանար «Ռեալից»: Կարոտում եմ նրան և նրա հետ մրցակցությունը»:
Կարիերայի լավագույն մարզիչը
«Իմ կարիերայի ընթացքում միշտ աշխատել եմ բարձրակարգ մարզիչների հետ, որոնցից շատ բան եմ սովորել:
Եթե պետք է առանձնացնեմ մի քանիսին, ապա Խոսեպ Գվարդիոլան և Լուիս Էնրիկեն տարբերվել են մյուսներից»:
Ուժեղագույն թիմը, որի դեմ խաղացել է
«Ֆուտբոլի 2010թ. աշխարհի առաջնության մեկնարկից առաջ Արգենտինայի հավաքականն ընկերական հանդիպում անցկացրեց Իսպանիայի հավաքականի հետ: Այդ թիմն ուժեղագույն թիմն էր, որի դեմ ես խաղացել եմ:
Ինչ վերաբերում է ակումբներին, ապա կառանձնացնեմ անգլիական թիմերին: Պրեմիեր լիգայում ֆուտբոլիստները ֆիզիկապես շատ ավելի լավ են պատրաստված»:
Կարիերայի ամենահիշարժան հանդիպումը
«Իմ կարիերայի ընթացքում շատ են եղել նման հանդիպումներ, սակայն կառանձնացնեմ 2010/11 մրցաշրջանում Չեմպիոնների լիգայի կիսաեզրափակիչում «Ռեալի» նկատմամբ 2:0 հաշվով տարած հաղթանակը: Դա յուրահատուկ հանդիպում է ինձ համար:
VAR համակարգի մասին
«Ինձ դուր է գալիս այդ համակարգը: Մրցավարը հնարավորություն է ունենում խորհրդակցել և ճիշտ որոշում ընդունել, սակայն կարծում եմ, որ այս համակարգի աշխատանքը կատարելագործման կարիք ունի»:
«Բարսելոնայի» ավագը լինելը՝ հպարտություն
«Մեծ պատասխանատվություն է «Բարսելոնայի» ավագը լինելը: Ես շատ երջանիկ ու հպարտ եմ, որ նման վստահություն ունեմ ակումբում:
Ինչո՞վ է զբաղվում Մեսին ազատ ժամանակ
«Իմ կյանքում ամենամեծ դերն ունի իմ ընտանիքը: Աշխատում եմ հնարավորինս երկար ժամանակ անցկացնել կնոջս և որդիներիս հետ:
Կինս՝ Անտոնելան, ֆիլմերի մեծ երկրպագու է, այդ պատճառով ես էլ հաճախ ստիպված եմ լինում քնելուց առաջ ֆիլմեր դիտել»:
Հետևեք NEWS.am SPORT-ին Facebook-ում, Twitter և Telegram-ում
02:04 , 19 ապրիլի 
01:55 , 19 ապրիլի 
01:52 , 19 ապրիլի 
01:10 , 19 ապրիլի 
01:02 , 19 ապրիլի 
23:59 , 18 ապրիլի 
23:46 , 18 ապրիլի 
23:25 , 18 ապրիլի 
22:48 , 18 ապրիլի 
21:57 , 18 ապրիլի 
