Լեւոն Արոնյանը բլիցում եւս հաղթեց ադրբեջանցի Շաքրիյար Մամեդյարովին

Հայկական շախմատի առաջատար Լեւոն Արոնյանը երկրորդ հաղթանակը տարավ ադրբեջանցի Շաքրիյար Մամեդյարովի նկատմամբ Սենթ Լուիսի մրցաշարում (St. Louis Rapid & Blitz)։ Արագ շախմատի մրցաշարից հետո գրոսմայստերները երկու օր կմրցեն կայծակնային խաղում։

Բլիցի առաջին պարտիայում Արոնյանը սպիտակներով ոչ ոքի խաղաց ռուսաստանցի Սերգեյ Կարյակինի հետ, իսկ երկրորդ պարտիայում սեւերով 82-րդ քայլում հաղթեց Մամեդյարովին, որին հաղթել էր նաեւ ռապիդի պարտիայում։

Բլիցի մրցաշարը երկու շրջանով է։ Ամեն զույգում կլինի նաեւ պատասխան մրցախաղ։

Բլիցում հաղթանակի համար տրվում է 1 միավոր, ոչ ոքիի համար՝ կես միավոր եւ գումարվում է արագ շախմատի մրցաշարում վաստակած միավորներին։

Արոնյանն այժմ 14,5 միավորով միանձնյա առաջատարն է։ Երկրորդ տեղում ընթացող ֆրանսիացի Մաքսիմ Վաշյե-Լագրավն ունի 13 միավոր, որը վաստակել է արագ շախմատում։ Կայծակնային խաղի առաջին երկու պարտիաներում Վաշյե-Լագրավը պարտվեց՝ աշխարհի չեմպիոն, նորվեգացի Մագնուս Կարլսենին եւ հունգարացի Ռիչարդ Ռապորտին։

Սենթ Լուիսի մրցաշարը Grand Chess Tour-ի չորրորդ փուլն է։

Հետևեք NEWS.am SPORT-ին Facebook-ում, Twitter և Telegram-ում