Տղաները փայլուն հանդես եկան, երեքն էլ հաղթահարեցին որակավորման փուլը, բայց եզրափակիչում հանդես կգան Արթուր Դավթյանն ու Վահագն Դավթյանը: Այս մասին NEWS.am Sport-ի թղթակցի հետ զրույցում Մինսկից ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:
Բելառուսի մայրաքաղաքում ընթացող Եվրոպական խաղերի 7-րդ մրցումային օրը պայքարի մեջ մտան մարմնամարզիկները: Հայաստանի թիմի կազմում մրցահարթակ դուրս եկան Արթուր Դավթյանը, Արթուր Թովմասյանն ու Վահագն Դավթյանը: Տեղի ունեցան բազմամարտի եւ առանձին գործիքների որակավորման մրցումները։ Արթուր Դավթյանը դուրս է եկել բազմամարտի, հենացատկի եւ ազատ վարժության եզրափակիչ, Վահագն Դավթյանը օղակի վարժության եզրափակիչ։
«Տղաների մասնակցությունից շատ գոհ եմ: Արթուր Դավթյանը բազմամարտում 2-րդ տեղով եզրափակիչ է դուրս եկել: Նա հավաքել է 83․231 միավոր: Երկրորդ տեղով եզրափակիչ մտնելը բազմամարտում շատ լավ արդյունք է:
Իր գործիքի վրա հենացատկում 5-րդ տեղն է զբաղեցրել 14.4 միավորով է եւ նորից եզրափակիչում է:
Ինձ համար անսպասելի է ազատ վարժությունում նրա եզրափակիչ դուրս գալը 14.2 միավորով: Արթուրն այսօր բոլորիս շատ ուրախացրեց իր փայլուն մրցելույթներով:
Հետաքրքիր պայքար ստացվեց օղակների վարժությունում: Վահագն Դավթյանը 14.5 միավոր է վաստակել, 14.4 միավոր՝ Արթուր Թովմասյանը: Տղաները կիսում են 5-րդ եւ 6-րդ տեղերը եւ երկուսն էլ դուրս էին եկել եզրափակիչ: Բայց քանի որ ամեն երկրից առանձին գործիքի վրա մեկ մասնակից կարող է լինել, եզրափակիչում կմասնակցի Վահագն Դավթյանը, քանի որ նա 5-րդ տեղում էր»,- ասաց Հակոբ Սերոբյանը:
Բազմամարտի եզրափակիչը տեղի կունենա հունիսի 29-ին, առանձին գործիքների եզրափակիչները՝ հունիսի 30-ին։
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում