Թուրինի «Յուվենտուսի» պորտուգալացի հարձակվող Կրիշտիանու Ռոնալդուն վերջին 13 տարում առաջին անգամ չի հայտնվել ազգային առաջնության լավագույն ռմբարկուների լավագույն եռյակում:
Ֆուտբոլի Իտալիայի ավարտված առաջնությունում 34-ամյա Ռոնալդուն 31 խաղում աչքի ընկավ 21 անգամ եւ ռմբարկուների ցուցակում հայտնվեց չորրորդ տեղում:
Նախորդ անգամ Ռոնալդուն ռմբարկուների լավագույն եռյակում չէր հայտնվել 2006-ին, երբ անգլիական «Մանչեսթեր Յունայթեդի» կազմում խփել էր 9 գոլ:
Հիշեցնենք, որ A Սերիայի լավագույն ռմբարկու էր դարձել «Սամպդորիայի» հարձակվող Ֆաբիո Կվալյարելան: 36-ամյա իտալացին մասնակցեց 37 հանդիպման եւ դարձավ 26 գոլի հեղինակ (9-ը՝ 11 մետրանոցից):
Ռմբարկուների ցուցակում երկրորդ տեղը գրավեց «Ատալանտայի» կոլումբացի հարձակվող Դուվան Սապատան, որը խփեց 23 գոլ: «Միլանի» լեհ հարձակվող Կշիշտոֆ Պյոնտեկը 22 գոլով եզրափակեց լավագույն եռյակը:
Հետևեք NEWS.am SPORT-ին Facebook-ում, Twitter և Telegram-ում