13:05  +04,  23 մայիսի, 2019

ՀԹՖ խորհրդի անդամ, ակումբի նախագահ․ Մանվել Գրիգորյանից պրծանք, հիմա էլ Սասուն Միքայելյա՞նն է նույն քայլերն անում

Վարդան Ղահրամանյանը կանխամտածված աշխարհի առաջնության մասնակիցների հայտերի գրանցումը եւ վիզաների վարչություն դիմելը ուշացրել է, որպեսզի հայտարարեն, թե մեր ՀՀ առաջնությունը բոյկոտելու եւ ուշ անցկացնելու պատճառով չհասցրեցին:

Այս մասին NEWS.am Sport-ի թղթակցի հետ զրույցում ասաց վաստակավոր մարզիչ, Հայաստանի թաեքվոնդոյի ֆեդերացիայի խորհրդի անդամ, «Տորք» ակումբի նախագահ Արսեն Ավետիսյանը:

Մայիսի 15-19-ը Մանչեսթերում կայացել է թաեքվոնդոյի աշխարհի առաջնությունը, որին Հայաստանի հավաքականը չի մասնակցել: Աշխարհի առաջնությունը վարկանիշային էր Տոկիո-2020-ի Օլիմպիական խաղերի համար, իսկ Հայաստանը ներկայացնող մարզիկները ժամանակի սղության պատճառով չեն հասցրել վիզաներ ստանալ՝ Մանչեստեր մեկնելու համար: Թե իրականում ինչն է եղել պատճառը, որ Հայաստանը մասնակից չի ունեցել աշխարհի առաջնությունում, տարբեր կարծիքներ են հնչում ֆեդերացիայից եւ ֆեդերացիայի ղեկավարությունից դժգոհող մարզիչների, ակումբերի ներկայացուցիչների կողմից:

Ի դեպ, նշենք, որ ֆեդերացիայի փոխնախագահ Վարդան Ղահրամանյանը հայտարարել էր, որ աշխարհի առաջնության համար 5 մլն դրամ ֆինանսավորում է ստացել, սակայն փաստացի ոչ մի մարզիկ չի մեկնել աշխարհի առաջնության:

Թաեքվոնդոյի աշխարհի առաջնությունում ըստ նախնական հայտի Հայաստանի հավաքականի կազմում պետք է հանդես գային Լեւոն Գասպարյանը (54 կգ), Ռոման Հայրապետովը (63 կգ), Սերգեյ Վարդազարյանը (68 կգ), Սերգեյ Ավանեսովը (74 կգ) եւ Արսեն Գրիգորյանը(-87 կգ): Նշենք, որ այս 5 մասնակիցներից ամենաբարձր վարկանիշային միավորներն ունի մոսկվայաբնակ Սերգեյ Վարդազարյանը, որը օլիմպիական ուղեգիր նվաճելու իրական հավակնորդ է:

Պարոն Ավետիսյան, Հայաստանի թիմը, որում նաեւ ձեր սանն էր, բաց թողեց աշխարհի առաջնությունը: Ինչո՞ւ, ի՞նչն էր պատճառը:

Ամեն ինչ եղել է այսպես. ապրիլի 2-ին կայացել է Հայաստանի առաջնությունը եւ դրանից անմիջապես հետո հնարավոր էր ներկայացնել հայտերը: Աշխարհի առաջնության մասնակցության հայտերը ներկայացնելու իրավունքը Վարդան Ղահրամանյանի ձեռքում էր, քանի որ միայն նա ունի հայտագրվելու համար բոլոր կոդերը: Իսկ հայտերը ներկայացվել են Հայաստանի առաջնության ավարտից շատ ուշ: Մրցումներից հետո զանգեցի Ղահրամանյանին եւ հետաքրքրվեցի, թե երբ են պատրաստվում ներկայացնել հայտերը, երբ են ժողով անելու՝ քննարկեն, թե ով է մարզիկների հետ մեկնելու մրցավայր որպես մարզիչ: Նա ինձ ասաց, որ մի քանի օր անց նոր կքննարկեն եւ ուզում են մրցումներից հետո մի փոքր թեթեւանալ: Երկու օր անցավ կրկին զանգահարեցի, իսկ նրանց հեռախոսները դարձան անհասանելի էին: Եւս երկու օր անցավ, մեզ հայտնի դարձավ, որ իրենք գրանցել են թիմի կազմը եւ որպես մարզիչ գրանցել են Զորիկ Մեքինյանին:

Վարդան Ղահրամանյանը միայն ապրիլի 12-ին նոր թիմի մասնակցության հայտն է ներկայացնում: Ապա դիմում են վիզաների վարչություն, տվյալների գրանցման եւ մուտքի վիզա ստանալու համար: Եվ միայն մայիսի 16-ին մեր թիմի անդամները ստանում են վիզաները, այն դեպքում, որ աշխարհի առաջնությունը մեկնարկել էր մայիսի 15-ին: Եթե այս ամենը մի քանի օր նույնիսկ 2-3 օր շուտ անեին, մեր թիմը կհասցներ գնալ առաջնության: Նրանց այսկերպ զոհաբերեցին ոչ միայն մեր, այլեւ իրենց մարզիկներին, որպեսզի մարզաշխարհին, մարզիկներին կարողանան խաբել ասել՝ մեզ խանգարեցին մարտի 16-ին Հայաստանի առաջնությունն անել, եւ իրենց պատճառով աշխարհի առաջնությունից մենք զրկվեցինք:

Իսկ ի՞նչ է շահում ֆեդերացիայի ղեկավարությունը ԱԱ-ին միտումնավոր չմասնակցելուց:

Այս ամենն արվեց նրա համար, որպեսզի ֆեդերացիայի նախագահի ընտրություններից առաջ իրենց ձեռքում «կոզր» ունենան մեր դեմ: Իրենք «թքած ունեն» այս ազգի, մարզաձեւի վրա: Հանուն իրենց կեղտոտ քայլերի ու նպատակների, ընտրություններում հաղթելու, որոշեցին «ժերտվա» տալ ամբողջ ազգային հավաքականին: Իմ մարզիկ Սերգեյ Վարդազարյանը մտել է դեսպանատուն ապրիլի 18-ին, մյուս մարզիկները 22, 23-ին: Հարց է առաջանում՝ ինչու են մարզիկներն ուշ մտել դեսպանատուն, ինչու են Հայաստանի առաջնությունից միայն 10 օր անց դիմել անձնագրերի եւ վիզաների վարչություն, ինչու են խումբ-խումբ մտել մարզիկները դեսպանատուն: Մենք վիզաների վարչությունից ճշտել ենք՝ իրենց զգուշացվել է, որ վիզաները շուտ չեն լինելու, աշխարհի առաջնության համար չեն հասցնելու, շատ են ուշացրել:

Աշխարհի առաջնության պետք է մասնակցեր նաեւ ձեր մարզիկը՝ Սերգեյ Վարդազարյանը: Ի՞նչ հնարավորություններ ուներ ԱԱ-ում Վարդազարյանը եւ օլիմպիական ուղեգրի ի՞նչ հավակնություններ ունի:

Ներկայումս հայկական թաեքվոնդոյում նա միակ մարզիկն է, ով 55 միավոր ունի եւ աշխարհի առաջնությունում մեծ շանսեր ուներ լավ արդյունք ցույց տալ ու վարկանիշային աղյուսակում լավագույն 32 թաեքվոնդոիստների մեջ հայտնվել: Իսկ լավագույն 32 թաեքվոնդոիստները հնարավորություն են ստանում Գրան Պրիների մասնակցել, ինչը մեծ վարկանիշային միավորներ է տալիս օլիմպիական ուղեգրերի համար: Ես վստահ հայտարարում եմ, որ Սերգեյ Վարդազարյանը շատ մոտ էր Օլիմպիական ուղեգրի եւ թերեւս միակ հույսն էր: Բայց այս խումբը Սերգեյին զրկեց օլիմպիական ուղեգիր նվաճելու հնարավորությունից, ուղղակի ջուրը գցեցին նրա այսքան տարիների աշխատանքը: Միակ հույսը մնաց Օլիմպիական խաղերից առաջ վարկանիշային մրցաշարը: Իսկ այնտեղ օլիմպիական ուղեգիր նվաճելը շատ բարդ է, քանի որ պարտադիր պետք է մեդալ նվաճես: Այս ամենն առնվազն թուրքի քաղաքականություն է, ստորություն է ֆեդերացիայի ղեկավարության կողմից:

Իմ մարզիկն այս աշխարհի առաջնությանը պատրաստվելու համար իր գրպանից մեծ գումարներ էր ներդրել: Միայն այս տարի մասնակցել էր բազմաթիվ մրցաշարերի:  Մոսկվայում իր աշխատանքը մեկ ամսով թողել էր՝ զրկվելով շուրջ 700 հազար դրամ աշխատավարձից, իր գրպանից Հայաստան գալու տոմսն էր գնել եւ դեռ պետք է հետ դսռնալու տոմսն առնի, հատուկ թանկ վիտամիններ է գնել, խմել: Մի խոսքով նա լիարժեք պատրաստվել էր այս առաջնությանը ու արդյունքում մի քանի հոգու թեթեւ ձեռքով կորցնում է մասնակցության իրավունքը... Եվ այս գումարները ո՞վ է վճարելու իմ մարզիկին՝ մասնակցության իրավունքը կորցնելուց հետո: Փաստացի մի ամբողջ տարվա աշխատանք, մի ամբողջ օլիմպիական ցիկլի աշխատանք գցեցին ջուրը:

Ու այս ղեկավարությունը, այս կազմը, մարզաձեւը ոչնչացնող, ազգային հավաքականին զոհ տվող այս խումբը որոշել է երկու օրից Երկրապահ կամավորների միության շենքում նախագահի ընտրություններ անցկացնել:

Այսինքն՝ մայիսի 24-ին է տեղի ունենալու նախագահի ընտրությո՞ւն:

Լինելու է հերթական խախտումներով ընտրությունը: Նախատեսված է ֆեդերացիայի համագումար, որի օրակարգում լինելու է նախագահի ընտրության հարցը: Ես մշտապես եղել եմ նախագահության անդամ: Իրենք էլ շեշտում են, որ նախագահության անդամների կազմում իմ անունն էլ է գրած: Եթե իմ անունը գրված է ու ես համարվում եմ նախագահության անդամ, եթե իրենք «Երկրապահում» հավաքվել են նախագահությունով, ինչ-որ օր են որոշել եւ նշանակել ընտրությունների համար, բա ինչո՞ւ ինձ տեղյակ չեն պահել, որպես նախագահության անդամ: Թե՞ մտածում եմ՝ քվորումն ապահովել են, այս մի անդամն էլ կարող է չլինել: Սա օրենքի կոպիտ խախտում է: Խախտում է նաեւ երկու օր առաջ տեղեկացնելը ընտրության մասին: Իրենք իրավունք չունեն զանգեն, ասեն՝ երկու օրից ընտրություն է: Մենք ունենք թեկնածու, մենք բողոքարկող կողմ ենք, իրենք պարտավոր են նախապես ժամանակ տալ մեզ, որպեսզի մենք ի վիճակի լինենք մեր  թեկնածուին առաջադրել:

Եւս մեկ խախտում կա առաջիկա ընտրություններում. նախագահության այն կազմի փաստաթուղթը, որով նրանք գնում են ընտրության, կեղծ է: Ամենահետաքրքիրն այն է, որ նախագահության կազմի փաստաթուղթը կեղծ լինելու մասին շատ լավ գիտեն սպորտի փոխնախարար Գեւորգ Լոռեցյանը եւ Երկրապահների միության նախագահ Սասուն Միքայելյանը: Այդ կեղծ փաստաթղթում հավաքագրված են Երկրապահների միության անդամների անուններ: Ստացվում է՝ Մավել Գրիգորյանից պրծանք, հիմա էլ Սասուն Միքայելյա՞նն է նույն քայլերն անում: Ի՞նչ է՝ Սասուն Միքայելյանը ընդառաջում է Մանվել Գրիգորյանի մարդկանց... Այս պահին ինձ համար այլեւս տարբերություն չկա՝ գեներալ Մանվել, թե Սասուն Միքայելյան... Եթե նա այդպես է վարվում ֆեդերացիայի հետ: Ստացվում է՝ բոլորով Սասուն Միքայելյանի հետ միասին քննարկել են, եկել են մի որոշման, որ բոլորով միասին այս մարզաձեւը կուլտուրական ոչնչացնեն:

Ի՞նչ եք պատրաստվում անել նախագահի ընտրության օրը:

Այդ համագումարն անօրինական են անում եւ մենք պատրաստվում ենք թույլ չտալ, որ այն կայանա: Ճիշտ է՝ իշխանությունից մարդ կա իրենց մեջ՝ Սասուն Միքայելյան։ Կյանքի գնով էլ լինի, թույլ չենք տալու, որ այդ համագումարը կայանա. Սասուն չէ, ով ուզում է լինի նրանց մեջ:

Լուսինե Շահբազյան

Հետևեք NEWS.am SPORT-ին Facebook-ում և Twitter-ում


Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

  • Այս թեմայով


  • Լրահոս
  • Հարցում
Քվեարկել են (12)
  • Ֆեյսբուք
  • NEWS.am Sport Exclusive
  • Արխիվ