Մոուրինյո. Մխիթարյանին լավագույնն են ճանաչել գործընկերները, նա հրաշալի խաղացող է
15:41 6 հուլիսի, 2016«Մանչեսթեր Յունայթեդի» մամուլի ծառայության հետ հարցազրույցում թիմի պորտուգալացի գլխավոր մարզիչ Ժոզե Մոուրինյոն խոսել է նաեւ Հայաստանի հավաքականի կիսապաշտպան Հենրիխ Մխիթարյանի մասին, սակայն այդ հատվածը չի հրապարակվել, քանի որ կողմերը դեռ չեն կնքել պայմանագիրը, փոխանցում է redcafe-ն:
«Մենք ձեռք ենք բերել Ֆրանսիայի առաջնության լավագույն խաղացողին (Զլատան Իբրահիմովիչ) եւ ֆուտբոլիստների քվեարկությամբ, Բունդեսլիգայի լավագույն խաղացող ճանաչված Մխիթարյանին: Նրան ընտրել են ոչ թե երկրպագուները կամ լրագրողները, այլ գործընկներները: Դա շատ բան արժի: Մխիթարյանը հրաշալի խաղացող է: Ինձ հիացնում է նրա գոլերի քանակը: Նա հարձակվող չէ, եւ անցած մրցաշրջանում նրա խփած գոլերի թիվն իսկապես տպավորիչ է: Նրա գոլային փոխանցումների քանակը վկայում է, որ Մխիթարյանը ստեղծագործող է, ցույց է տալիս խաղի թիմային ընկալումն ու պատկերացումը: Դա շատ կարեւոր է մեզ համար: Մեզ դիմակայելու են պաշտպանական ֆուտբոլ ցուցադրող թիմեր, եւ Մխիթարյանը կարող է արագացնել խաղի տեմպը: Նա կարողանում է փոխել արագությունը գնդակով կամ առանց գնդակի: Դա եւս շատ կարեւոր է»,- ասել է Մոուրինյոն:
27-ամյա Մխիթարյանի հեռանալու մասին «Բորուսիան» պաշտոնապես հայտարարել է: Ոչ պաշտոնական տվյալներով, «Մանչեսթեր Յունայթեդը» սպասում է Մխիթարյանի համար Մեծ Բրիտանիայում աշխատանքի իրավունքի ձեւակերպմանը:
© 2024 NEWS.am - Sport
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։