Արթուր Աբրահամ. Պակյաոյի մենամարտից հետո երազում էի MGM Grand-ում հանդես գալու մասին
16:05 11 փետրվարի, 2016Պրոֆեսիոնալ բռնցքամարտի սուպերմիջին քաշային կարգում WBO վարկածով աշխարհի չեմպիոն Արթուր Աբրահամը խոսել է մեքսիկացի Ջիլբերտո Ռամիրեսի հետ մենամարտի մասին:
«Այս մենամարտը երազանքի իրականացում է ինձ համար: ԱՄՆ-ում անցկացրած նախորդ մենամարտերիս ժամանակ մեծ իրադարձության զգացողություն չունեի: 2011-ին մեծ տպավորություններ ստացա MGM Grand-ում կայացած Պակյաո - Մոզլի մենամարտից: Դրանից հետո երազում էի այդ մարզապալատում մենամարտելու մասին:
Ինձ համար հեշտ չի լինելու, քանի որ Ռամիրեսը բռնցքամարտի լավ ավանդույթներ ունեցող երկրից է: Նա ցանկանում է դառնալ պատմության առաջին մեքսիկացին, որն աշխարհի չեմպիոն կդառնա սուպերմիջին քաշային կարգում: Սակայն ես, լինելով Գերմանիայում բնակվող եւ մենամարտող հայ, ունեմ հաղթելու երկու պատճառ՝ հպարտություն եւ պատիվ: Այդ մենամարտում ռինգ դուրս կգամ «Ավելի լավ է մահանալ հպարտ, քան ապրել ծնկի իջած» կարգախոսով: Դա իմ կարիերայի մեծագույն հաղթանակն է լինելու»,- Աբրահամի խոսքը փոխանցում է Fighthype.com-ը:
Հիշեցնենք, որ 35-ամյա Աբրահամի ու 24-ամյա Ռամիրեսի միջեւ մենամարտը կայանալու է ապրիլի 9-ին Լաս Վեգասում: Հայ բռնցքամարտիկը նախորդ անգամ ԱՄՆ-ում մենամարտել է 2012-ի մայիսի 14-ին՝ Կալիֆորնիայում պարտվելով ամերիկացի Անդրե Ուորդին: Նա նախորդ մենամարտն անցկացրել է 2015-ի նոյեմբերի 21-ին Գերմանիայի Հանովեր քաղաքում, որտեղ միավորներով հաղթել էր անգլիացի Մարտին Մարեյին:
© 2024 NEWS.am - Sport
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։