Ալեքսեյ Լովչեւը գերազանցեց լեգենդար ծանրորդ Հուսեյն Ռեզազադեի 2 ռեկորդները
12:51 29 նոյեմբերի, 2015ԱՄՆ-ի Հյուսթոն քաղաքում ավարտված ծանրամարտի աշխարհի առաջնության վերջին օրը մրցահարթակ դուրս եկած ռուս Ալեքսեյ Լովչեւն աշխարհի 2 ռեկորդ է սահմանել գերծանրքաշային կարգում:
26-ամյա Լովչեւը ռեկորդ է գրանցել հրում վարժությունում ու երկամարտում: Նա հրել է ռեկորդային 264 կգ եւ երկամարտում հավաքել դարձյալ ռեկորդային 475 կգ:
Նախորդ ռեկորդները պատկանում էին իրանցի լեգենդար ծանրորդ Հուսեյն Ռեզազադեին: Նա հրել էր 263 կգ եւ երկամարտում գրանցել 472 կգ: Իրանցուն է շարունակում պատկանել պոկում վարժության ռեկորդը, որը կազմում է 213 կգ: Ալեքսեյ Լովչեւը Հյուսթոնում պոկել էր 211 կգ:
Հիշեցնենք, որ գերծանրքաշային կարգում Հայաստանն ուներ 2 ներկայացուցիչ՝ Գոռ Մինասյանը եւ Ռուբեն Ալեքսանյանը: Մինասյանը երկամարտի 437 կգ (203+234) արդյունքով գրավեց չորրորդ տեղը եւ նվաճեց փոքր բրոնզե մեդալ, իսկ Ալեքսանյանը 8-րդն էր՝ 433 կգ (192+241): Ռուբենն ազդրի վնասվածք էր ստացել հրում վարժության երկրորդ մոտեցման ժամանակ եւ չէր կարողացել շարունակել պայքարը:
© 2024 NEWS.am - Sport
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։