ԱԱ-2015. Անդրանիկ Կարապետյանը չորրորդն է, Տիգրան Մարտիրոսյանը ձախողվեց

Հյուսթոնում (ԱՄՆ) շարունակվող ծանրամարտի աշխարհի առաջնությունում Հայաստանի ներկայացուցիչներից 77 կգ քաշային Անդրանիկ Կարապետյանը երկամարտում գրավեց չորրորդ տեղը՝ ցույց տալով 363 կգ (167+196) արդյունք (անձնական քաշով տանուլ տվեց երրորդ տեղը գրաված եգիպտացի Մահմուդ Մոհամեդին: Պոկում վարժությունում Կարապետյանն արժանացավ բրոնզե մեդալի: Չեմպիոն հռչակված Նիջաթ Ռահիմովի արդյունքն է 372 կգ: Նույն արդյունքով երկրորդ տեղը զբաղեցրեց Հյուսիսային Կորեայի ներկայացուցիչ Կվան Սոն Կիմը:

Աշխարհի ու Եվրոպայի չեմպիոն Տիգրան Մարտիրոսյանը ձախողեց երեք մոտեցումներն էլ՝ չկարողանալով բարձրացնել 163 կգ-ն:

Հայաստանն ունի եւս վեց մասնակից: Նազիկ Ավդալյանը պայքարի մեջ կմտնի նոյեմբերի 26-27-ին ժամը 01:30-ին: Նոյեմբերի 27-28-ին մեդալների համար կպայքարեն 75 կգ քաշային Սոնա Պողոսյանը (ժամը 01:00-ին), իսկ ժամը 03:30-ին` Սիմոն Մարտիրոսյանը (105 կգ): Մրցումային վերջին օրը պայքարի դուրս կգան գերծանր քաշային Գոռ Մինասյանը եւ Ռուբեն Ալեքսանյանը՝ ժամը 01:00, իսկ 03:30-ին՝ Հռիփսիմե Խուրշուդյանը (+75 կգ):