Եվրոպայի լիգա. «Բորուսիան» հաղթանակ տարավ, Հենրիխ Մխիթարյանը՝ գոլային փոխանցման հեղինակ

Ֆուտբոլի Եվրոպայի լիգայի որակավորման երրորդ փուլից մեկնարկած Դորտմունդի «Բորուսիան» արտագնա հանդիպում անցկացրեց ավստրիական «Վոլֆսբերգերի» հետ եւ առավելության հասավ նվազագույն հաշվով: Միակ գնդակը 14-րդ րոպեին խփեց 23-ամյա գերմանացի կիսապաշտպան Յոնաս Հոֆմանը: Գոլային փոխանցումը կատարեց Հայաստանի հավաքականի կիսապաշտպան Հենրիխ Մխիթարյանը, որը դորտմունդյան թիմի մեկնարկային կազմում էր եւ անցկացրեց ամբողջ հանդիպումը:

Առաջատարների մասնակցությամբ մյուս հանդիպումներում Բիլբաոյի «Աթլետիկը» 2:0 հաշվով հաղթեց Բաքվի «Ինտերին», անգլիական «Վեստ Հեմը» 2:2 հաշվով խաղաց ռումինական «Աստրայի» հետ, անգլիական «Սաութհեմփթոնը» 3:0 հաշվով ուժեղ էր հոլանդական «Վիտեսից», իտալական «Սամպդորիան» 0:4 հաշվով պարտվեց սերբական «Վոյվոդինային»:

Երեւանի «Ալաշկերտին» պայքարից դուրս թողած Ղազախստանի «Կայրաթը» տանը 2:1 հաշվով հաղթեց շոտլանդական «Աբերդինին», Գյումրիի «Շիրակի» արգելքը հաղթահարած շվեդական ԱԻԿ-ը սեփական խաղադաշտում 1:3 հաշվով պարտվեց հունական «Ատրոմիտոսին»: