Դավիդ Յուրչենկո. Ցանկանում եմ խաղալ Հայաստանի հավաքականում, բայց դա ձեռնտու չէ ինձ

Բաշկիրիայի «Ուֆայի» դարպասապահ Դավիդ Յուրչենկոն անդրադարձել է Ռուսաստանի առաջնությունում լեգեոնականների նոր՝ «6+5» լիմիտին ու Հայաստանի հավաքականում հանդես գալու ցանկությանն ու դրան խոչընդոտող հանգամանքներին:

«Այս պահին այդ հարցը դեռ փակված չէ, քանի որ Հայաստանի ֆուտբոլի ֆեդերացիայի ներկայացուցիչները կապ չեն հաստատել իմ վստահված անձի հետ, որը զբաղվում է այդ հարցով: Նա բազմիցս զանգել է այնտեղ, եւ նրան խոստացել են պատասխանել, սակայն այդպես էլ հետ չեն զանգել: Չեմ կարող ասել, որ այդ հարցը 100 տոկոսով փակված է: Ես ունեմ նոր փուլ սկսելու, նոր մարտահրավերի եւ Հայաստանի հավաքականի ֆուտբոլիստ դառնալու ցանկություն, սակայն Ռուսաստանի Պրեմյեր լիգայի լիմիտի պատճառով այդպիսի քայլի դիմելը ձեռնտու չէ եւ աննպատակահարմար»,- Յուրչենկոյի խոսքը մեջբերում է eurofootball.ru-ն:

Հիշեցնենք, որ Դավիդ Յուրչենկոն երկրպագուների քվեարկության արդյունքում ճանաչվել էր «Ուֆայի»՝ ավարտված մրցաշրջանի լավագույն ֆուտբոլիստ: