Վարդան Մինասյան. Հայաստանի հավաքականից առաջարկ եղել է, թե՝ ոչ, չեմ կարող ասել

Այժմ բոլոր մտքերս կապված են միայն «Փյունիկի» հետ, իսկ թե ով կգլխավորի Հայաստանի հավաքականը, դա կորոշի ֆուտբոլի ֆեդերացիան: Այժմ ինձ մարզչական դադար է հարկավոր եւ կկենտրոնանամ իմ նոր պաշտոնի վրա:

Այդ մասին ապրիլի 27-ին կայացած ասուլիսում հայտարարեց ղազախական «Տոբոլի» գլխավոր մարզիչի պաշտոնից հեռացված Վարդան Մինասյանը, ով վերադարձել է Երեւանի «Փյունիկ» եւ զբաղեցրել է թիմի գործադիր տնօրենի պաշտոնը: Երիտասարդ մասնագետը հրաժարվեց պատասխանել Հայաստանի հավաքականը գլխավորելու մասին եւ ՀՖՖ-ից առաջարկ ստանալու վերաբերյալ հարցերին: 

«Չէի կարծում, որ այս պաշտոնում նշանակումս այսպիսի մեծ հետաքրքրություն կառաջացնի եւ կգան այսքան լրագրողներ: Չէի ցանկանա խոսել «Տոբոլի» թիմից հեռանալու պատճառների մասին, կանդրադառնամ միայն «Փյունիկին»: «Փյունիկն» իր քաղաքականությունը երբեք չի փոխում եւ դարբնոց է Հայաստանի բոլոր տարիքային հավաքականների համար: «Փյունիկի» խաղերին հետեւում եմ, նրանք արժանիորեն են զբաղեցնում առաջին տեղը: «Փյունիկի» այժմյան դիրքը կապված է կայունության հետ, թեեւ «Ուլիսը» լավ էր սկսել առաջնության սկզբնամասը:

Ռաֆայել Նազարյանը նույն կարգավիճակում է, ինչ ես: Ապագան ցույց կտա, թե ինչ կլինի: Միայն կարող եմ ասել, որ նա «Փյունիկում» չէ: Ինչ վերաբերում է մարզչական կարիերայիս հետագա զարգացմանը, ապա այն նոր եմ սկսել եւ դեռ չեմ մտածում ավարտելու մասին: Երկու ակումբներից ունեի առաջարկներ, սակայն այժմ ինձ դադար է պետք եւ չեմ մտածում այլ բաների մասին: Այժմ բոլոր մտքերս կապված են միայն «Փյունիկի» հետ:

Թե ով կգլխավորի Հայաստանի հավաքականը, դա կորոշի ֆուտբոլի ֆեդերացիան, իսկ ես կկենտրոնանամ իմ պաշտոնի վրա: Հայաստանի հավաքականից առաջարկ եղել է, թե՝ ոչ, չեմ կարող ասել: Հավաքականի վերաբերյալ հարցերի չեմ պատասխանում:

Ղազախստանում աշխատելը մեծ փորձ էր ինձ համար: Ինչ վերաբերում է հայ ֆուտբոլիստների՝ Ղազախստանում հանդես գալուն, ապա այնտեղի առաջնության մակարդակը շատ բարձր է եւ մոտ է եվրոպականին»,- ասաց Վարդան Մինասյանը:

Ասուլիսից առաջ «Փյունիկի» նախագահ Ռաֆիկ Հայրապետյանը Վարդան Մինասյանին շնորհավորեց նոր պաշտոնի կապակցությամբ եւ նշեց, որ «Տոբոլի» հետ պայմանագիրը խզած Կառլեն Մկրտչյանն առաջիկայում մարզվելու է երեւանյան ակումբում:

«Կարծում եմ՝ Վարդան Մինասյանին ներկայացնելու կարիք չկա: Շնորհավորում եմ նրան նոր պաշտոնի կապակցությամբ: Ինչ վերաբերում է Կառլեն Մկրտչյանին, ապա նա կմարզվի «Փյունիկի» հետ մինչեւ տեսնենք, թե ինչ կլինի», - ասաց Ռաֆիկ Հայրապետյանը:

Հիշեցնենք, որ Վարդան Մինասյանը մարզչական կարիերան սկսել է հենց «Փյունիկում», որտեղից տեղափnխվել էր Հայաստանի հավաքական՝ ազգային թիմը գլխավորելով 4 տարի:

Դավիթ Եղիազարյան