Դորտմունդի «Բորուսիան» շարունակում է առաջադիմել

Գերմանական Բունդեսլիգայի 30-րդ տուրում «Բորուսիան» Դորտմունդում 2:0 հաշվով վստահ հաղթանակ տարավ Ֆրանկֆուրտի «Այնտրախտի» նկատմամբ:

Նախորդ տուրում գոլի ու գոլային փոխանցման հեղինակ դարձած Հենրիխ Մխիթարյանն այս խաղում եւս «Բորուսիայի» մեկնարկային կազմում էր: Առաջին խաղակեսում Յուրգեն Կլոպի թիմը լուրջ ճնշում չէր գործադրում մրցակցի վրա, սակայն խփեց 2 գոլ: Հաշիվը 24-րդ րոպեին 11 մետրանոց հարվածով բացեց գաբոնցի հարձակվող Պյեր-Էմերիկ Օբամեյանգը, ով քիչ անց նաեւ գոլային փոխանցում կատարեց ճապոնացի Սինձի Կագավային: Առաջին խաղակեսի վերջնամասում Հենրիխ Մխիթարյանը դեղին քարտ ստացավ մրցակցի հետ բախվելու համար:

Ընդմիջումից հետո եւս «Այնտրախտի» մոտ ոչինչ չէր ստացվում առջեւի գծում, իսկ «Բորուսիան» ունեցավ մի քանի գոլային պահեր, սակայն հաշվի մեջ փոփոխություն չգրանցվեց: Հայաստանի հավաքականի կիսապաշտպանը երկրորդ խաղակեսում ավելի ակտիվ էր եւ փոխարինվեց 87-րդ րոպեին:

Այս հաղթանակի շնորհիվ դորտմունդցիներն առաջադիմեցին 3 աստիճան՝ 39 միավորով բարձրանալով 7-րդ տեղ:

Գերմանիայի առաջնություն, 30-րդ տուր

«Բորուսիա Դ.» - «Այնտրախտ Ֆ.»՝ 2:0

Պյեր-Էմերիկ Օբամեյանգ, 24 (11մ), Սինձի Կագավա, 32

«Համբուրգ» - «Աուգսբուրգ»՝ 3:2

Իվիցա Օլիչ, 11, Պյեր-Միշել Լասոգա, 19, 71, Ռաուլ Բոբադիլիա, 25, Տոբիաս Վերներ, 69

«Հանովեր» - «Հոֆենհայմ»՝ 1:2

Լարս Շտինդլ, 24 (11մ) – Անտոնի Մոդեստ, 1, Սվեն Շիպլոկ, 83

«Քյոլն» - «Բայեր»՝ 1:1

Բարդ Ֆինե, 83 – Յուլիան Բրանդտ, 61

«Շտուտգարտ» - «Ֆրայբուրգ»՝ 2:2

Դանիել Գինչեկ, 25, Մարտին Հարնիկ, 27 – Նիլս Պետերսեն, 58 (11մ), 85

Հեռացում՝ Ադամ Հլուշեկ, 66 («Շտուտգարտ»)