Հենրիխ Մխիթարյանի գործակալը հրաժարվել է առաջադրվել ՖԻՖԱ-ի նախագահի ընտրությունում
21:15 27 հունվարի, 2015Հայտնի իտալացի ֆուտբոլային գործակալ Մինո Ռայոլան հրաժարվել է ՖԻՖԱ-ի նախագահի ընտրություններում թեկնածությունն առաջադրելու գաղափարից: Ռայոլան այդ որոշումն ընդունել է Հոլանդիայի ֆուտբոլի ֆեդերացիայի նախագահ Միխայել վան Պրաագի առաջադրումից հետո՝ առաջարկելով իր աջակցությունը ՖԻՖԱ-ի նախագահ Յոզեֆ Բլատերի դեմ ընտրապայքարում: Ռայոլան ավելի վաղ հայտարարել էր, որ Բլատերի վերընտրվելուն ամեն կերպ խանգարելու համար կառաջադրի իր թեկնածությունը:
«Բլատերին դիմակայելու համար մեզ անհրաժեշտ է լավ թեկնածու: Այժմ մենք ունենք նրան: Վան Պրաագը լավ կապեր ունի, քաղաքականությանը վերաբերող հարցերում իրեն ավելի բնական է պահում: Ես երջանիկ եմ ազատել ճանապարհը նրա նման թեկնածուի համար»,- Ռայոլայի խոսքը մեջբերում է NOS-ը: Գործակալը ներկայացնում է Հենրիխ Մխիթարյանի, Զլատան Իբրահիմովիչի, Մարիո Բալոտելիի, Պոլ Պոգբայի շահերը:
Բլատերի եւ Վան Պրաագից բացի, ՖԻՖԱ-ի նախագահի պաշտոնին հավակնում են նաեւ Հորդանանի արքայազն Ալի բան Ալ Հուսեյնը, ՖԻՖԱ-ի նախկին գլխավոր քարտուղար Ժերոմ Շամպանը եւ Ֆրանսիայի հավաքականի նախկին ֆուտբոլիստ Դավիդ Ժինոլան:
© 2024 NEWS.am - Sport
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։