Ծաղկաձորում դահուկով սահելիս վատ զգացի, ինձ անմիջապես տեղափոխեցին Երեւան, Էրեբունի բժշկական կենտրոն եւ ստենտավորում արեցին: Երեւի շատ ճնշում գործադրեցի, ծանրաբեռնվածություն տվեցի, այդ պատճառով էլ վատացա: Ինձ արդեն շատ լավ եմ զգում, ցանկանում եմ դուրս գալ, բայց թույլ չեն տալիս:
Այս մասին NEWS.am Sport-ի թղթակցի հետ զրույցում ասաց օլիմպիական չեմպիոն, հունահռոմեական ըմբշամարտի Հայաստանի հավաքականի գլխավոր մարզիչ Լեւոն Ջուլֆալակյանը, ով հունվարի 21-ին Ծաղկաձորից տեղափոխվել է Երեւանի «Էրեբունի» բժշկական կենտրոն, որտեղ էլ անոթի ստենտավորման է ենթարկվել:
«Ես էլ չգիտեմ՝ ինչ է պատահել ինձ, ինչպես է պատահել: Դահուկով սահելիս կտրուկ վատ զգացի, չհասկացա՝ ինչն էր պատճառը, ուժեղ ցավ զգացի: Կողքից նկատեցին, ճանաչեցին, անմիջապես կապ հաստատեցին ներքեւի հետ, բուրանով ինձ իջեցրին սարից, շատ արագ կազմակերպված շտապօգնության մեքենայով տեղափոխեցին Երեւան, բժիշկները զննեցին, նկարեցին եւ ստենտավորեցին:
Ես առողջական խնդիր չունեմ, ճնշման խնդիր չունեմ, բժիշկն ասում է՝ տրոմբ է եղել, անոթներից մեկը խցանվել է, բացեցին, ստենտ դրեցին: Ամեն ինչ շատ արագ եղավ, ես էլ չհասկացա՝ ինչպես: Ես ցավ զգացող մարդ չեմ, բայց տղաներն ասում են, որ շատ ուժեղ ցավացել է ամբողջ ճանապարհին մինչեւ Երեւան: Երեւի պատճառն այն է, որ շատ մեծ ծանրաբեռնվածություն տվեցի ինձ։ Հիմա շատ լավ եմ, ուզում եմ դուրս գալ, թույլ չեն տալիս: Մինչեւ երկուշաբթի պիտի մնամ այստեղ»,- ասաց Լեւոն Ջուլֆալակյանը:
Լուսինե Շահբազյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։