Նախապես որեւէ հայտարարություն չեմ ցանկանում անել, մրցահարթակը ցույց կտա: Ունեմ լավ մարզավիճակ: Չեմ վախենում ոչ մեկից եւ չեմ անհանգստանում ոչնչից: Ամեն ինչ պարզ կլինի մրցահարթակում:
Այս մասին NEWS.am Sport-ի թղթակցի հետ զրույցում ասաց Ալմաթիում այս օրերին ընթացող ծանրամարտի աշխարհի առաջնության 69 կգ քաշային կարգում Հայաստանի ներկայացուցիչ Վանիկ Ավետիսյանը, որը մրցահարթակ դուրս կգա այսօր՝ նոյեմբերի 10-ին:
Վանիկ, ինչպե՞ս ես տրամադրված այսօրվա ելույթին:
Լավ եմ տրամադրված, նպատակային, որ լավ արդյունք ցույց տամ, ծանր կիլոգրամներ բարձրացնեմ եւ վարկանիշ ձեռք բերեմ: Չեմ վախենում ոչ մեկից եւ չեմ անհանգստանում ոչնչից: Ամեն ինչ պարզ կլինի մրցահարթակում: Ինքնավստահություն ունեմ, որն այս պարագայում ամենալավ օգնող հանգամանքն է յուրաքանչյուր մարզիկի համար:
Ի՞նչ մարզավիճակում ես գտնվում:
Բավական լավ: Երկարատեւ մարզումներ ենք ունեցել, հավաքներ, ծանր ու մեծ աշխատանք է արվել աշխարհի առջնությունից առաջ: Բայց դա դեռ չի նշանակում, որ վստահ կարող ենք հայտարարել, թե պարտադիր մեդալ ենք նվաճելու: Ամեն ինչ կախված է մրցումից, մրցահարթակից:
Վանիկ, ի՞նչ կարեւորություն ունի քեզ համար մասնակցությունն աշխարհի առաջնությանը:
Բացի այն, որ սա տարվա կարեւորագույն մրցաշարն է, այն նաեւ օլիմպիական վարկանիշային է: Ինձ համար 100 տոկոսով կարեւորվում է այս առաջնությունը եւ առաջնությունում իմ մասնակցությունը:
Մեդալի ակնկալիք ունե՞ս:
Ակնկալիքներից խոսել դեռեւս չեմ կարող: Մրցահարթակը ցույց կտա ամեն ինչ: Եթե հնարավորություն ունենամ պայքարել մեդալի համար, միանշանակ կպայաքարեմ ուժերիս չափով: Իմ քաշային կարգում չեմ առանձնացնում ոչ մեկին՝ այս երկրի ներկայացուցիչն է մրցակից, այն երկրինը: Ինձ համար բոլորն էլ մրցակից են, այն էլ աշխարհի առաջնությունում: Երկամարտում ներկայացրել ենք 330 կգ-ի հայտ: Մնում է միայն ամեն ինչ բարեհաջող անցնի:
Լուսինե Շահբազյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։