Ալբանիան կբողոքարկի ՈւԵՖԱ-ի որոշումը

Ալբանիայի ֆուտբոլի ֆեդերացիան կբողոքարկի ՈւԵՖԱ-ի կարգապահական կոմիտեի որոշումը, տեղեկացնում է AFP-ն: Եվրո-2016-ի ընտրական փուլի Սերբիայի հավաքականի հետ խաղի միջադեպի պատճառով ՈւԵՖԱ-ն տուգանել էր Ալբանիայի ֆուտբոլի ֆեդերացիային եւ հավաքականին գրանցել տեխնիկական պարտություն:

«ՈւԵՖԱ-ի կարգապահական կոմիտեն չվերականգնեց արդարությունը: Երեք միավորը պատկանում է Ալբանիայի հավաքականին: Նրանք մեզանից խլեցին այն, ինչին արժանի էինք»,- ասել է Ալբանիայի հավաքականի գլխավոր մարզիչ Ջանի Դե Բյազին:

Հիշեցնենք, որ Եվրո-2016-ի ընտրական փուլի Սերբիա - Ալբանիա հանդիպումը դադարեցվել էր 42-րդ րոպեին խաղադաշտի վրա թռչող սարքի միջոցով հայտնված Մեծ Ալբանիայի (ներառյալ Կոսովոն) դրոշի պատճառով: Հանդիպումն ընդհատվել է 0:0 հաշվի ժամանակ: