Բլեզ Մատյուիդի. Շառլ Ազնավուրից բացի, Հայաստանի մասին շատ քիչ բան գիտեմ

Թեեւ այս խաղն ընկերական է, բայց մեծ պատիվ է հանդես գալ հավաքականի կազմում, Հայաստան - Ֆրանսիա հանդիպման նախախաղային ասուլիսում նշեց Ֆրանսիայի հավաքականի եւ Փարիզի ՊՍԺ-ի կիսապաշտպան Բլեզ Մատյուիդին, փոխանցում է NEWS.am Sport-ի թղթակիցը։

«Շառլ Ազնավուրից բացի, Հայաստանի մասին շատ քիչ բան գիտեմ: Ֆուտբոլային մակարդակով գիտեմ ձեր ֆուտբոլիստին, ով հանդես է գալիս Գերմանիայում:

Թեեւ այս խաղն ընկերական է, բայց մեծ պատիվ է հանդես գալ հավաքականի կազմում: Հույս ունեմ, որ լավ հանդես կգամ, ինչպես նախորդ խաղում:

Ֆրանսիայի հավաքականը Եվրոպայի առաջնության եզրափակիչ մրցաշարում կարող է հաջող հանդես գալ: Մեզ պետք է հավաքված լինել, լավ խաղալ եւ հաջողությունը երկար սպասել չի տա:
Բրազիլիայում տեղի ունեցած աշխարհի առաջնությունից հետո մենք առաջադիմել ենք, ավելի լավ ենք ճանաչում միմյանց: Երիտասարդ ֆուտբոլիստները նույնպես լավ են հանդես գալիս թիմում:
Ինձ համար մեծ պատիվ էր նախորդ խաղում լինել թիմի ավագը: Բայց թիմի իսկական ավագը Ուգո Լյորիսն է»,- ասաց Բլեզ Մատյուիդին:

Հիշեցնենք, որ Ֆրանսիան Եվրո2016-ի կազմակերպիչն է, եւ ընտրական մրցաշարում թիմը խաղում է հաշվարկից դուրս։

Հայաստան - Ֆրանսիա ընկերական հանդիպումը տեղի կունենա հոկտեմբերի 14-ին եւ կմեկնարկի 20։00-ին։

Վերա Մարտիրոսյան

Ֆոտո՝ Արսեն Սարգսյան / NEWS.am Sport