Ֆուտբոլի Չեմպիոնների լիգայի խմբային փուլի երկրորդ տուրում Դորտմունդի «Բորուսիան» առանց վնասվածքից ապաքինվող Հենրիխ Մխիթարյանի Բրյուսելում 3:0 հաշվով առավելության հասավ բելգիական «Անդերլեխտի» նկատմամբ:
Դորտմունդցիները շատ վստահ սկսեցին խաղը եւ արդեն երրորդ րոպեին բացեցին հաշիվը: Ճապոնացի կիսապաշտպան Սինձի Կագավայի հիանալի փոխանցումից հետո աչքի ընկավ իտալացի հարձակվող Չիրո Իմոբիլեն: Առաջին խաղակեսում «Բորուսիայի» գրոհներն ավելի վտանգավոր էին ստացվում: Հյուրերի առավելությունը կարող էր կրկնապատկել գաբոնցի Պյեր-Էմերիկ Օբամեյանգը, ով վրիպեց շատ հարմար դիրքից:
Յուրգեն Կլոպի թիմը նկատելի առավելություն ուներ նաեւ ընդմիջումից հետո եւ, խփելով 2 գոլ, տարավ վստահ հաղթանակ: Խաղի վերջնամասում դուբլի հեղինակ դարձավ փոխարինման դուրս եկած կոլումբացի հարձակվող Ադրիան Ռամոսը, ով ապահովեց «Բորուսիայի» երկրորդ հաղթանակը:
D խմբի մյուս խաղում «Արսենալն» անգլիացի հարձակվող Դենի Ուելբեկի հեթ-տրիկի օգնությամբ Լոնդոնում 4:1 հաշվով վստահ հաղթանակ տարավ թուրքական «Գալաթասարայի» նկատմամբ՝ խաղն ավարտելով 10 ֆուտբոլիստներով:
C խմբում Լեւերկուզենի «Բայերը» տանը 3:1 հաշվով պարտության մատնեց Լիսաբոնի «Բենֆիկային»:
Չեմպիոնների լիգա, խմբային փուլ, երկրորդ տուր
D խումբ
«Անդերլեխտ» (Բելգիա) - «Բորուսիա» Դ.» (Գերմանիա)՝ 0:3
Չիրո Իմոբիլե, 3, Ադրիան Ռամոս, 70, 79
«Արսենալ» (Անգլիա) - «Գալաթասարայ» (Թուրքիա)՝ 4:1
Դենի Ուելբեկ, 22, 30, Ալեքսիս Սանչես, 41 – Բուրակ Յիլմազ, 63 (11մ.)
Հեռացում՝ Վոյցեխ Շչեստնի, 60 («Արսենալ»)
C խումբ
«Բայեր» (Գերմանիա) - «Բենֆիկա» (Պորտուգալիա)՝ 3:1
Ստեֆան Կիսլինգ, 25, Սոն Հյոն Մին, 34, Հական Չալհանօղլու, 64 (11մ.) – Էդուարդո Սալվիո, 62
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։