Սիմեոնե. «Ռեալի» նկատմամբ հաղթանակը վստահություն հաղորդեց մեզ

Մադրիդի «Աթլետիկոյի» գլխավոր մարզիչ Դիեգո Սիմեոնեն վստահ է, որ Իսպանիայի չեմպիոնը կկարողանա պայքարել հաղթանակի համար սեպտեմբերի 20-ին Պրիմերայի չորրորդ տուրում կայանալիք «Սելտայի» հետ տնային հանդիպման ժամանակ։ Արգենտինացի մասնագետը գտնում է, որ նախորդ տուրում Մադրիդի «Ռեալին» հաղթելուց հետո «Աթլետիկոյի» ֆուտբոլիստներն իրենց ավելի վստահ են զգում։

«Կարծում եմ, որ «Ռեալի» նկատմամբ հաղթանակը վստահություն է հաղորդել մեզ։ Հանդես ենք գալու սեփական երկրպագուների աջակցությամբ, սակայն մրցակիցն ուժեղ է եւ դժվարություններ կստեղծի մեզ համար։ Հույս ունենք հասնել լավ արդյունքի»,- Սիմեոնեի խոսքը մեջբերում է Goal.com-ը։