Ձամբրոտա. «Միլանի» խնդիրը Բերլուսկոնիի ժլատությունն է

«Միլանի» եւ Իտալիայի հավաքականի նախկին պաշտպան Ջանլուկա Ձամբրոտան քննադատել է «Միլանի» սեփականատեր Սիլվիո Բերլուսկոնիի տրանսֆերային քաղաքականությունը՝ մեղադրելով նրան ժլատության մեջ:

«Բերլուսկոնին չի ցանկանում ներդրում անել եւ ծախսեր կատարել «Միլանում» այնպես, ինչպես նախկինում: Խոշոր տրանսֆերների բացակայության պատճառով Իտալիայի առաջնությունը կորցնում է գրավչությունը: Դա լուրջ հիմնախնդիր է: Նախկինում իտալական ակումբներն այսքան հետ չէին Իսպանիայի, Անգլիայի եւ Գերմանիայի ակումբներից:

Ֆիլիպո Ինձագին ունի հաջողության համար անհրաժեշտ ամեն ինչ, սակայն առաջատար ֆուտբոլիստների գնել չի կարող: Իտալիայի առաջնության գլխավոր խնդիրը բյուջեն է: Մենք չենք կարող մեզ թույլ տալ 80 միլիոն եվրոյի տրանսֆեր: Իսկ ուժեղագույն ֆուտբոլիստները սիրում են խոշոր առաջարկներ: Բալոտելին ցանկանում էր օգնել «Միլանին», բայց նա դեռ երիտասարդ է եւ պետք է կատարելագործվի: Նա ունի տաղանդ եւ վարպետություն, բայց պետք է փոխի մտածողությունը»,- Ձամբրոտայի խոսքը մեջբերում է Eurosport-ը:

Ձամբրոտան «Միլանում» հանդես է եկել 2008-2012 թվականներին: Իտալիայի հավաքականի կազմում դարձել է 2006թ. աշխարհի չեմպիոն: