Ֆուտբոլային Եվրոպայում սեպտեմբերի 1-ն ամառային տրանսֆերային պատուհանի փակման օրն է:
Տրանսֆերների վերջին օրը կայացել են մի շարք տեղափոխություններ: Ներկայացնում ենք տրանսֆերային պատուհանի վերջին օրվա գլխավոր գործարքները:
Իտալական «Միլանը» պայմանագիր է կնքել «Ատալանտայի» 25-ամյա կիսապաշտպան Ջակոմո Բոնավենտուրայի հետ: Ավելի վաղ միլանցիները ակումբի թվիթերյան էջում հայտնել էին իտալական «Պարմայի» կիսապաշտպան Ջոնաթան Բիաբիանիի տեղափոխության մասին, սակայն ֆրանսիացու տրանսֆերը վերջին պահին ձախողվել է:
Իտալական «Նապոլիի» ֆուտբոլիստներ Գորան Պանդեւն ու Բլերիմ Ձեմաիլին տեղափոխվել են Ստամբուլի «Գալաթասարայ»:
Կատալոնական «Բարսելոնայի» եւ Մադրիդի «Ռեալի» նախկին հարձակվող Խավյեր Սավիոլան հունական «Օլիմպիակոսից» տեղափոխվեց իտալական «Վերոնա»:
Անգլիական «Հալ Սիթին» վարձակալել է «Նյուքասլի» կիսապաշտպան Հաթեմ բեն Արֆային եւ «Սաութհեմփթոնի» խաղացող Գաստոն Ռամիրեսին:
Մոսկվայի «Սպարտակի» ռուս կիսապաշտպան Դինյար Բիլյալետդինովը կարիերան կշարունակի ռուսական «Տորպեդոյում»:
Իտալական «Ինտերի» եւ Արգենտինայի հավաքականի կիսապաշտպան Ռիկարդո Ալվարեսը դարձել է անգլիական «Սանդերլենդի» ֆուտբոլիստ:
Պորտուգալիայի հավաքականի հարձակվող Հելդեր Պոշտիգան ազատ խաղացողի կարգավիճակով միացել է Լա Կորունիայի «Դեպորտիվոյին»:
Անգլիական «Լիվերպուլի» նախկին պաշտպան Յոն Առնե Ռիսեն Լոնդոնի «Ֆուլհեմից» տեղափոխվել է կիպրոսյան ԱՊՕԷԼ, որը խաղալու է Չեմպիոնների լիգայում:
Ֆրանսիական «Մոնպելյեի» 24-ամյա պաշտպան Բենժամեն Ստամբուլին տեղափոխվել է Լոնդոնի «Տոտենհեմ», որը վարձավճարով գերմանական «Համբուրգին» է տրամադրել Լյուիս Հոլթբիին:
Մոսկվայի «Դինամոյի» ռուս հարձակվող Ֆյոդոր Սմոլովը միացել է Եկատերինբուրգի «Ուրալին»:
Հռոմի «Ռոման» մեկ տարով վարձակալել է անգլիական «Նյուքասլի» ֆրանսիացի պաշտպան Մապու Յանգ Մբիվային:
Իտալական «Ֆիորենտինան» վարձակալել է «Մանչեսթեր Սիթիի» անգլիացի պաշտպան Միկա Ռիչարդսին:
Լոնդոնի «Տոտենհեմի» բրազիլացի կիսապաշտպան Սանդրոն դարձել է ՔՊՌ-ի ֆուտբոլիստ:
Լուսանկարում՝ Ռիկարդո Ալվարես
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։