Ռոման Բերեզովսկի. Չերչեսովը պահանջում է խաղալ Նոյերի պես

11:55   27 օգոստոսի, 2014

Մոսկվայի «Դինամոյի» եւ Հայաստանի հավաքականի 40-ամյա դարպասապահ Ռոման Բերեզովսկին խոսել է ռուս Վլադիմիր Գաբուլովի, գերմանացի Մանուել Նոյերի եւ ռուսական ֆուտբոլի բացասական կողմերի մասին:

«Մարզվելով Գինտարաս Ստուաչեի հետ՝ առաջին անգամ եմ հանդիպում այսպիսի հետաքրքիր ու բազմատիպ մարզումների: Բոլոր առաջադրանքները նման են խաղային դրվագների:

Ինչ վերաբերում է Գաբուլովին, ապա պետք է հիշել, որ սխալվում են բոլորը: Ի՞նչ է, Ակինֆեեւն աշխարհի առաջնությունից հետո պետք է այլեւս չխաղա՞ր: Պետք է աջակցել մարդուն: Գաբուլովը երբեք թույլ չի տվել կոպիտ սխալներ:

Այժմ Ռուսաստանում շատ են բացասական բաները: Այնքան էլ հաճելի չէ, երբ ստադինում լսում ես ոչ կոռեկտ վանկարկումներ: Ռուսերենը հարուստ լեզու է եւ կարելի է հորինել մի շարք դրական երգեր: Ամեն դեպքում, ստադինում լինում են նաեւ երեխաներ, ովքեր լսում են դրանք: Պետք է հարգել բոլորին՝ անկախ մաշկի գույնից: Հայրենասիրությունը ճիշտ բան է, սակայն ցավալի է, երբ այն հասնում է ազգայնամոլության:

Չերչեսովը երբեմն ինձանից պահանջում է խաղալ Նոյերի պես, ինչպես լիբերո: Սակայն այդպիսի խաղը միշտ վտանգավոր է: Եթե դուրս ես գալիս դեպի գնդակը, ապա պետք է վստահ լինես՝ չկասկածելով ոչ մի վայրկյան: Գուցե Նոյերը գիտակցում է, որ եթե սխալվի եւ թիմը գոլ բաց թողնի, ապա ակումբակիցները շատ արագ կխփեն մի քանի գնդակ: Նման կերպ փորձեցի խաղալ «Սպարտակի» դեմ, սակայն մի քիչ սխալ հաշվարկեցի: Խաղադաշտը հարթ չէր, բայց հասկանալի է, որ դա իմ սխալն էր»,- Բերեզովսկու խոսքը մեջբերում է «Советский спорт»-ը:

Հիշեցնենք, որ Ռուսաստանի առաջնության առաջին տուրից հետո Ռոման Բերեզովսկին դարձել էր «Դինամոյի» հիմնական դարպասապահը:



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։