Սերբիայի մայրաքաղաք Բելգրադում անցկացվող բռնցքամարտի Եվրոպայի առաջնությունում Գուրգեն Մադոյանը պարտվեց 1/8 եզրափակիչում:
71 կգ քաշային Մադոյանը քառորդ եզրափակիչի ուղեգրի համար մրցեց Չեռնոգորիայի ներկայացուցիչ Ստեֆան Սավկովիչի հետ եւ պարտվեց 2:5 հաշվով:
Առաջին ռաունդում մրցավարները առավելությունը տվեցին Հայաստանի ներկայացուցիչին, միայն մեկ մրցավար հաղթանակը տվել էր Չեռնոգորիայի ներկայացուցիչին: Երկրորդ ռաունդում միավորներով առավել էր Ստեֆան Սավկովիչը: Երրորդ ռաունդում Գուրգեն Մադոյանն ավելացրեց ճնշումը: Հոնքի վնասվածք ստացավ: Բժշկի զննումից հետո նա շարունակեց մենամարտը: Մենամարտն ավարտվեց 5:2 հաշվով՝ Սավկովիչի հաղթանակով:
Ապիլի 20-ին Մադոյանը որակավորման փուլում 5:0 հաշվով առավելության էր հասել Հունգարիան ներկայացնող Ռոմեո Բուզայի նկատմամբ:
4-րդ մրցումային օրը վստահ հաղթանակով մեկնարկեցին Եվրոպայի փոխչեմպիոն Արթուր Բազեյանը (57 կգ), Արարատ Հարությունյանը (67 կգ) եւ Համլետ Հարությունյանը (86 կգ): Բազեյանը 1/8 եզրափակիչում 5:0 հաշվով պարտության մատնեց լեհ Յակուբ Կրժպյեդին: Արարատ Հարությունյանը 5:0 հաշվով հաղթեց լեհ Մատեուս Գրեժբերին: Համլետ Հարությունյանը որակավորման փուլում 4:3 հաշվով հաղթեց սլովակ Ժոզեֆ Կոստուրին:
Քառորդ եզրափակիչում Բազեյանի մրցակիցը կլինի Իտալիայի ներկայացուցիչ Ջուզեպե Կանոնիկան, Արարատ Հարությունյանի մրցակիցը՝ Սլովակիայի ներկայացուցիչ Նեչ Պետրիկը:
Եվրոպայի առաջնությունում Կարեն Աղամալյանի գլխավորած հավաքականից հաղթանակներով են տարել Արթուր Սահակյանը (60 կգ) , աշխարհի ու Եվրոպայի բրոնզե մեդալակիր Նարեկ Մանասյանը (92 կգ), պարտություններ են կրել Վախթանգ Հարությունյանը (75 կգ), Եվրոպայի փոխչեմպիոն Ռաֆայել Հովհաննիսյանը (80 կգ), Նարեկ Հովհաննիսյանը (63,5 կգ) եւ Դավիթ Չալոյանը (+92 կգ):
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։