«Նոայի» մոզամբիկցի եւ պորտուգալացի նորեկները

«Նոան» պայմանագիր է կնքել 27-ամյա մոզամբիկցի պաշտպան Դավիթ Մալեմբանայի հետ, հաղորդում է երեւանյան ակումբի մամուլի ծառայությունը։

Գերմանիայում ծնված և երկքաղաքացիություն ունեցող ֆուտբոլիստը կարիերան սկսել է Դրեզդենի «Դինամոյի» երիտասարդական թիմում, հանդես է եկել Բուլղարիայում, Պլովդիվի «Լոկոմոտիվի» կազմում դարձել է Բուլղարիայի սուպերգավաթակիր։ Նա 2 հանդիպում է անցկացրել Մոզամբիկի ազգային հավաքականի կազմում։

«Նոային» է միացել նաեւ 23-ամյա պորտուգալացի պաշտպան Պեդրո Ֆարիմը, որը կարիերան սկսել է «Բելենենսեշի» մանկապատանեկան թիմում, մեկ մրցաշրջան է անցկացրել իտալական «Կյեվոյի» կազմում։ Նրա նախորդ ակումբը Պորտուգալիայի Երրորդ լիգայում հանդես եկող «Ռեալն» էր։