Եվրոպայի լավագույն ֆուտբոլիստ. Ռոնալդուն հաղթել է հսկայական առավելությամբ

ՈւԵՖԱ-ն ներկայացրել է Եվրոպայի անցած մրցաշրջանի լավագույն ֆուտբոլիստի քվեարկության արդյունքները:

Եվրոպայի լավագույն ֆուտբոլիստ ճանաչված Կրիշտիանու Ռոնալդուն հաղթել է հսկայական առավելությամբ: Չեմպիոնների լիգայի գավաթակիր Մադրիդի «Ռեալի» եւ Եվրոպայի չեմպիոն Պորտուգալիայի հավաքականի հարձակվողի օգտին քվերակել են ժյուրիի 55 անդամներից 40-ը: Մադրիդի «Աթլետիկոյի» ֆրանսիացի հարձակվող Անտուան Գրիզմանը ստացել է 8 ձայն, իսկ Մադրիդի «Ռեալի» ուելսցի կիսապաշտպան Գարեթ Բեյլը՝ 7:

Ժյուրիի կազմում են ՈւԵՖԱ-ի անդամ 55 երկրների լրագրողները, որոնցից յուրաքանչյուրը նշել է Եվրոպայի 5 լավագույն ֆուտբոլիստներին՝ հերթականությամբ: Առաջին տեղում նշված ֆուտբոլիստը ստանում է 5 միավոր, երկրորդ տեղինը՝ 4 եւ այդպես շարունակ: Եզրափակիչ եռյակի քվեարկությունը կայացել էր օգոստոսի 25-ին Մոնակոյում կայացած Չեմպիոնների լիգայի խմբային փուլի վիճակահանության ժամանակ: Լրագրողներն ուղիղ եթերում քվեարկել են հատուկ էլեկտրոնային համակարգի միջոցով:

Հիշեցնենք, որ լավագույն տասնյակում տեղ էին գտել նաեւ՝ Լուիս Սուարեսը («Բարսելոնա», Ուրուգվայ), Լիոնել Մեսին («Բարսելոնա», Արգենտինա), Ջանլուիջի Բուֆոնը («Յուվենտուս», Իտալիա), Պեպեն («Ռեալ», Պորտուգալիա), Մանուել Նոյերը («Բավարիա», Գերմանիա), Տոնի Կրոսը («Ռեալ», Գերմանիա) եւ Թոմաս Մյուլերը («Բավարիա», Գերմանիա):

Հետևեք NEWS.am SPORT-ին Facebook-ում, Twitter և Telegram-ում