Հայաստանի չեմպիոն «Փյունիկը» պարտությամբ մեկնարկեց Բարձրագույն խմբի 24-րդ առաջնությունում: Խաղից հետո «Փյունիկի» եւ Հայաստանի ազգային հավաքականի գլխավոր մարզիչ Սարգիս Հովսեփյանն ամփոփեց հանդիպումը:
«Փյունիկը» նորմալ խաղում էր, սակայն սխալ թույլ տվեցինք, միայն դրանից հետո խաղը փոխվեց, անփույթ խաղացինք: Ուշադրության խնդիր ունենք: Ուշադիր չեն, մեկը մյուսին չի լսում, չեն խոսում եւ չեն լսում: Միայն Ռոմերոյի բացակայությունը չէ, որ զգալ է տալիս թիմում: Չեմ կարող ասել, թե ինչքանով է թիմի սելեկցիան հաջողվել: Հիմա մրցաշրջանի առաջին խաղն է դեռ: Եթե լավ, բարձրակարգ հարձակվող ունենայինք, լավ կլիներ:
Վարդան Պողոսյանի վիճակը նորմալ է, բայց վնասվածք ունի, նոր է վերականգնվում: Դեռ 100 տոկոս պատրաստ չէ»,- նշեց Սարգիս Հովսեփյանը::
«Ալաշկերտի» գլխավոր մարզիչ Աբրահամ Խաշմանյանը թիմի հաղթաթուղթը համարում է կազմակերպված եւ թիմային խաղը:
«Մրցաշրջանի առաջին խաղն էր: Հանդիպել էին հավասար հնարավորությունների տեր թիմեր: Երկուս էլ ունեին գոլային լավ պահեր: Հաշվի առնելով եղանակային պայմանները՝ լավ խաղ էր: Բնական է, որ բաց թողած գոլը հոգեբանական նշանակություն ունի: Կարեւորն այն է, որ ընդունած գնդակից հետո թիմը հավաքվում եւ գոլ է խփում:
Մենք հաշվի ենք առնում՝ ում հետ ենք խաղում: Ունենք 3-4 լավ հարձակվող: Թիմում առողջ մրցակցություն կա, որը որակ է ապահովում: Մեր հաղթաթուղթը կազմակերպված եւ թիմային խաղն է: Սա առաջին խաղն էր: Ամեն ինչ առջեւում է, ոչ մի հեռանկարային ծրագրեր չեմ դնում»,- ասաց Աբրահամ Խաշմանյանը:
Հիշեցնենք, որ «Ալաշկերտը» կամային հաղթանակ է տարել բրազիլացի հարձակվող Հեբերի դուբլի շնորհիվ՝ 2:1: Հաշիվը բացել էր «Փյունիկի» եւ Հայաստանի ազգային հավաքականի պաշտպան Վարազդատ Հարոյանը:
Շուշանիկ Հակոբյան (ֆոտո՝ NEWS.am Sport)
Հետևեք NEWS.am SPORT-ին Facebook-ում, Twitter և Telegram-ում