Ֆուտբոլի Չեմպիոնների լիգայի խմբային փուլի 5-րդ տուրում Դորտմունդի «Բորուսիան» Լոնդոնում 0:2 հաշվով պարտվեց «Արսենալին», որը Յուրգեն Կլոպի թիմի պես ապահովեց փլեյ-օֆֆի ուղեգիր:
Խաղի մեկնարկը շատ հաջող ստացվեց անգլիացիների համար, քանի որ արդեն երկրորդ րոպեին ֆրանսիացի հարձակվող Յայա Սանոգոն առաջ մղեց դաշտի տերերին: Մեկնարկում ավելի ակտիվ էին լոնդոնցիները, սակայն «Բորուսիան» աստիճանաբար հավասարեցրեց խաղը: Հայաստանի հավաքականի կիսապաշտպան Հենրիխ Մխիթարյանը հյուրերի մեկնարկային կազմում էր եւ առաջին խաղակեսում ունեցավ 2 գոլային պահ: Առաջին դեպքում Հենրիխի հարվածը շեղ ստացվեց, իսկ երկրորդ դեպքում արգենտինացի դարպասապահ Դամիան Մարտինեսը փրկեց «Արսենալին»:
Ընդմիջումից հետո Արսեն Վենգերի թիմը կորցրեց մի քանի գոլային պահեր, իսկ 57-րդ րոպեն նաեւ խփեց երկրորդ գոլը: Հաշիվը գեղեցիկ հարվածով կրկնապատկեց չիլիացի Ալեքսիս Սանչեսը: Մնացած ժամանակահատվածում «Բորուսիան» չկարողացավ լուրջ խնդիրներ առաջացնել մրցակցի համար եւ առաջին պարտությունը կրեց Չեմպիոնների լիգայի այս մրցաշարում: Հենրիխ Մխիթարյանը խաղաց առանց փոխարինման:
Խմբի մյուս խաղում բելգիական «Անդերլեխտը» տանը 2:0 հաշվով հաղթեց Ստամբուլի «Գալաթասարային»՝ ապահովելով խմբում երրորդ տեղն ու Եվրոպայի լիգայի ուղեգիր:
C խմբում «Մոնակոն» նվազագույն հաշվով արտագնա հաղթանակ տարավ փլեյ-օֆֆի ուղեգիր նվաճած Լեւերկուզենի «Բայերի» նկատմամբ:
Չեմպիոնների լիգա, խմբային փուլ, 5-րդ տուր
D խումբ
«Արսենալ» (Անգլիա) - «Բորուսիա» (Գերմանիա)՝ 2:0
Յայա Սանոգո, 2, Ալեքսիս Սանչես, 57
«Անդերլեխտ» (Բելգիա) - «Գալաթասարայ» (Թուրքիա)՝ 2:0
Չանսել Մբեմբա, 44, 86
Հեռացում՝ Սելջուկ Ինան, 83 («Գալաթասարայ»)
C խումբ
«Բայեր» (Գերմանիա) - «Մոնակո» (Ֆրանսիա)՝ 0:1
Լուկաս Օկամպոս, 72
Հետևեք NEWS.am SPORT-ին Facebook-ում, Twitter և Telegram-ում