Յուրա Մովսիսյանի գեղեցիկ փոխանցումը նպաստեց «Սպարտակի» հաղթանակին

Ֆուտբոլի Ռուսաստանի առաջնության 14-րդ տուրում Մոսկվայի «Սպարտակը» սեփական խաղադաշտում 4:2 հաշվով պարտության մատնեց Սարանսկի «Մորդովիային»:

Մոսկվայի «Օտկրիտիե Արենա» ստադիոնում կայացած խաղի հաշիվը բացվեց 9-րդ րոպեին, երբ Հայաստանի հավաքականի հարձակվող Յուրա Մովսիսյանի արտակարգ փոխանցումից հետո հոլանդացի կիսապաշտպան Կվինսի Պրոմեսն առաջ մղեց «Սպարտակին»: 18-րդ րոպեին հոլանդացին դարձավ նաեւ դուբլի հեղինակ, իսկ քիչ անց բրազիլացի պաշտպան Ժոաո Կարլոսը նաեւ եռապատկեց դաշտի տերերի առավելությունը: Հյուրերին մինչեւ ընդմիջման գնալը հաջողվեց կրճատել հաշվի տարբերությունը, իսկ երկրորդ խաղակեսում «Մորդովիան» ոչնչով չզիջեց մրցակցին: Յուրի Սյոմինի թիմը խփեց նաեւ երկրորդ գոլը, սակայն ավելին անել չհաջողվեց: Յուրա Մովսիսյանը հաճախ էր գտնվում պայքարի մեջ եւ 88-րդ րոպեին խաղադաշտում տեղը զիջեց ռուս հարձակվող Արտյոմ Ձյուբային, ով ավելացված ժամանակում վերջակետ դրեց խաղին:

Այս հաղթանակից հետո «Սպարտակը» հավաքեց 25 միավոր եւ հավասարվեց 3-4-րդ տեղերը բաժանող «Դինամոյին» եւ ԲԿՄԱ-ին:

Ռուսաստանի առաջնություն, 14-րդ տուր

«Սպարտակ» - «Մորդովիա»՝ 4:2

Կվինսի Պրոմես, 9, 18, Ժոաո Կարլոս, 27, Արտյոմ Ձյուբա, 90+3 – Մարկո Լոմիչ, 45 (11մ.), Ռուսլան Մուխամետշին, 58

Հետևեք NEWS.am SPORT-ին Facebook-ում, Twitter և Telegram-ում