Վարդան Մինասյանին ես բազմիցս խնդրել եմ, պահանջել եմ, որ մնա հավաքականում, բայց նա չցանկացավ, նա պարզապես վիրավորված էր ֆուտբոլիստներից, լրագրողներից, երկրպագուներից, այդ պատճառով էլ գնաց: Բոլորը արտասահմանցի մարզիչ էին ուզում։
Այս մասին Ավանի ֆուտբոլային ակադեմիայում ընթացող մամուլի ասուլիսում նշեց Հայաստանի ֆուտբոլի ֆեդերացիայի նախագահ Ռուբեն Հայրապետյանը, փոխանցում է NEWS.am Sport-ի թղթակիցը։
«Շալանդին պետք է ժամանակ տրվի, ես նրա հետ չեմ խոսել խաղից հետո, ես շատ վրդովված էի: Ես նրա հետ կխոսեմ, եւ եթե նա չլսեց ինձ, չընդունեց իմ խորհուրդները, նկատողությունները, ես արդեն որոշում կկայացնեմ:
Նրան հաջողվել է ֆուտբոլիստների հետ լեզու գտնել, նա արդեն ընտելացել է: Նրան ժամանակ է պետք տալ: Ես նրան իմ խորհուրդներով, իմ լծակներով կփորձեմ օգնել: Նրան տանք եւս մեկ հնարավորություն, եթե ստացվեց՝ լավ, եթե ոչ՝ հանելը միշտ էլ կա:
Պորտուգալիայի դեմ պարտության պատճառը վատ խաղալն էր: Սխալ տակտիկան: Մենք ունենք պոտենցիալ, սխալ մարտավարության արդյունքում մենք պարտվել ենք Պորտուգալիային: Մենք ունենք հրաշալի ֆուտբոլիստներ` Մարկոս Պիզելի, Արթուր Սարկիսով, ովքեր պահեստայինների նստարանին նստած էին:
Մխիթարյանի դեմ կոշտ էին խաղում, լավ էին անում, թող մերոնք էլ Ռոնալդուի հետ կոշտ խաղային: Ֆուտբոլը պայքար է, հո բալետ չէ: Իրենք հասկացել էին, ովքեր են ուժեղ, ովքեր են լավ մարզավիճակում եւ այդ ֆուտբոլիստների հետ կոշտ էին խաղում: Յուրա Մովսիսյանը փայլուն ֆուտբոլիստ է: Նա ամեն ինչ փորձեց անել, ուղղակի սխալ մարտավարություն էր մշակված:
Շալանդը բողոքեց Պորտուգալիայի ֆուտբոլի ֆեդերացիայի կազմակերպչական աշխատանքից, բայց Հայաստանի ֆեդերացիան ոչ մի բողոք չի ներկայացնի:
Շալանդը թող պրոբլեմները ուրիշ տեղ փնտրի: Թող մենք խաղում հաղթեինք, թող իրենք վատ կազմակերպեին: Մենք մեր վատ խաղալը չբարդենք Պորտուգալիայի ֆեդերացիայի վրա:
Շալանդն այս պահին Իտալիայում է, գնացել է Իտալիա - Ալբանիա խաղին հետեւի: Վերադառնա ես նրա հետ կխոսեմ: Իմ բոլոր նկատողությունները նրան կասեմ»,- ասաց Ռուբեն Հայրապետյանը:
Հիշեցնենք, որ Եվրոպայի առաջնության ընտրական մրցաշարում Հայաստանի հավաքականը 1։2 հաշվով պարտվել է Դանիային, 1։1 հաշվով ոչ ոքի է խաղացել Սերբիայի հետ եւ 0։1 հաշվով պարտվել է Պորտուգալիային։ I խմբի մրցաշարային աղյուսակը 7 միավորով գլխավորում է Դանիայի թիմը։ 1 միավոր քիչ ունի Պորտուգալիան։ Ալբանիան 4 միավորով երրորդ տեղում է։ Սերբիան ու Հայաստանը 1-ական միավորով եզրափակում են մրցաշարային աղյուսակը։ Առաջին երկու տեղերը գրաված թիմերը կնվաճեն եզրափակիչ մրցաշարի ուղեգրեր։ Երրորդ տեղը զբաղեցրած հավաքականը կանցկացնի փլեյ-օֆֆի անցումային հանդիպումներ։
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում