Եթե հրավեր ստանամ Հայաստանի ազգային հավաքականից, ապա մեծ սիրով կընդունեմ: Այդ մասին NEWS.am Sport-ի թղթակցի հետ զրույցում ասաց «Փյունիկի» նորեկ Սեզար Ռոմերոն, ով այս պահին գլխավորում է Հայաստանի Բարձրագույն խմբի լավագույն ռմբարկուների աղյուսակը՝ վեց խաղում խփելով չորս գնդակ: Սեզար Ռոմերոն հանդես է եկել Մեքսիկայում, ամերիկյան ՄԼՍ-ում, ինչպես նաեւ Գերմանիայի երրորդ լիգայում: Մեքսիկացի ֆուտբոլիստն ունի ԱՄՆ-ի եւ Մեքսիկայի քաղաքացիություն:
Սեզար, դու արդեն երկու ամսից ավելի է Հայաստանում ես: Արդեն հարմարվե՞լ ես:
Միշտ էլ դժվար է հարմարվել նոր միջավայրին, բայց դա աշխատանքի մի մասն է: Բայց ամեն ինչ շատ լավ է ընթանում: Բոլորը շատ ջերմ են իմ նկատմամբ:
Ընտանիքդ բնակվում է ԱՄՆ-ում: Չես պատրաստվո՞ւմ նրանց բերել Հայաստան:
Մայրս եւ որդիս բնակվում են ԱՄՆ-ում: Ես փորձում եմ նրանց բերել այստեղ: Բայց տղաս անձնագիր չունի, որպեսզի կարողանա լքել երկիրը:
Ինչո՞ւ որոշեցիր գալ Հայաստան: Ուրիշ թիմերից առաջարկներ կայի՞ն:
Իմ գործակալ Ռուբեն Վեսմադյանը կարծեց, որ Հայաստան գալը ինձ համար դրսեւորվելու եւ աճելու լավ հնարավորություն է: Ես շատ գոհ եւ ուրախ եմ, որ այդպես ստացվեց:
Բայց եթե Հայաստան չգայիր, որտե՞ղ կարող էիր հայտնվել:
Չգիտեմ, թե ինչպես կստացվեր: Ես այստեղ եմ եւ ուրախ եմ:
Վաղո՞ւց ես համագործակցում գործակալիդ հետ:
Մոտ մեկ տարի է: Մենք միասին գնացինք Մեքսիկա, որտեղ ես խաղում էի: Բացի աշխատանքային հարաբերություններից, մենք նաեւ լավ ընկերներ ենք: Իսկ դա շատ կարեւոր է՝ վստահել գործակալին: Այդ պատճառով, երբ նա ասաց, որ Հայաստանը լավ տարբերակ է, ինձ մոտ կասկածներ չեղան:
Շատ ֆուտբոլիստներ հաճախ նախապատվությունը տալիս են փողին, քան ավելի լավ թիմում խաղալուն եւ հետագայում առաջ գնալու հնարավարություն ունենալուն: Ի՞նչն ես դու ավելի կարեւորում՝ հաշվի առնելով, որ ֆուտբոլիստի կարիերան այդքան էլ երկար չէ:
Ես հանդես եմ եկել տարբեր առաջնություններում՝ Մեքսիկայի, ԱՄՆ-ի ՄԼՍ-ում, Գերմանիայում: Հաճախ պետք է բախտ ունենաս: Պետք է սիրես աշխատանքդ: Հաճախ հեռու լինես քո սիրած մարդկանցից, որպեսզի առաջ գնաս: Ցանկացած ֆուտբոլիստ կերազի խաղալ «Ռեալում», բայց երբ այդպիսի տարբերակ լինի, պետք է նայես տվյալ առաջարկին, պայմաններին: Այսպես դժվար է ասել:
Կհամեմատե՞ս Հայաստանի առաջնությունը մյուս բոլոր առաջնությունների հետ, որտեղ հանդես ես եկել:
Ֆուտբոլի ոճը լիովին տարբեր է: Մեքսիկայում ավելի շատ տեխնիկական ֆուտբոլ է, ԱՄՆ-ում՝ ավելի ֆիզիկական, Գերմանիայում` այդ երկուսը միասին: Հայաստանն ունի իր ոճը, որին ես դեռ փորձում եմ հարմարվել: Այստեղ ավելի շատ պետք է վազել: Մեր թիմը շատ երիտասարդ է:
Ի՞նչ կասես Հայաստնի մարզադաշտերի մասին:
Մի քանիսը տեսել եմ: Կան այնպիսիները, որտեղ այդքան էլ հեշտ չէ խաղալ, բայց «Փյունիկի» դաշտը հիանալի է:
Ու՞մ կառանձնացնես «Փյունիկում»: Ովքե՞ր հետագայում կարող են աստղեր դառնալ:
Մենք շատ լավ թիմ ունենք: Կարծում եմ՝ ամենից շատ տաղանդները հենց այստեղ են: Նրանք շատ երիտասարդ են՝ ավելի քան ես: Կարծում եմ նրանցից շատերը կարող են հաջողության հասնել:
Հայաստանի լավագույն ֆուտբոլիստները հիմնականում տեղափոխվում են Ռուսաստան կամ Ուկրաինա: Կցանկանայի՞ր այդ առաջնություններում հանդես գալ:
Լսել եմ, որ Հայաստանից հենց այդ երկրներ են գնում: Այո, կուզեի, ինչու ոչ:
Սեզար, դու հանդես ես եկել ԱՄՆ-ի երիտասարդական հավաքականներում: Հավատո՞ւմ ես, որ գուցե մի օր ազգային հավաքականում էլ կհայտնվես:
Անիրական ոչինչ չկա: Ցանկացած մարդու համար մեծ պատիվ է խաղալ իր ազգային հավաքականում:
Եթե շարունակես այսպիսի արդյունքներ գրանցել, կցանկանա՞ս, որ Հայաստանի ազգային հավաքականից քեզ հրավիրեն:
Այո, իհարկե մեծ սիրով:
Այս վերջին աշխարհի առաջնությունը ցույց տվեց, որ ԱՄՆ-ում ֆուտբոլի հանդեպ սերը մեծացել է: Համամի՞տ ես:
Այո: Ընդամենը մի քանի տարի առաջ ֆուտբոլի նկատմամբ այսքան մեծ ուշադրություն չկար: Իսկ վերջին վեց տարիներին ֆուտբոլը ամրացրել է իր դիրքերը: Ամերիկացիները լավ հանդես եկան աշխարհի առաջնությունում: Անգամ ՄԼՍ-ում, որտեղ ես հանդես եմ եկել, առաջնության խաղերին 20-30 հազար հանդիսատես կա:
Հայաստանի առաջնությունում արդեն վեց խաղ ես խաղացել: Ի՞նչ կասես մրցակից թիմերի մասին:
Մրցակցություն կա: Մենք ունենք լավ թիմ, բայց մրցակիցները նունպես լավն են: Այս պահին չեմ կարող ասել, ովքեր են ֆավորիտները: Ամեն բան կարող է պատահել: «Ուլիսը» եւ «Շիրակը» շատ ուժեղ են, բայց բոլորն էլ արժանի են հարգանքի:
Ի՞նչ կասես Սուպերգավաթի խաղի մասին:
Դա լավ խաղ էր: «Փյունիկը» խաղում էր երկրորդ թիմով եւ «Բանանցը» հաղթեց:
Իսկ ո՞րն էր ամբողջ կազմը փոխելու պատճառը:
Այս շաբաթ մենք շատ կարեւոր խաղ ունենք, եւ մարզիչը չէր ուզում, որ վնասվածք ստանայինք: Բացի այդ դա հնարավորություն էր երիտասարդների համար:
Ֆուտբոլից դուրս ինչպիսի՞ն է կյանքդ Հայաստանում: Ի՞նչն է քեզ այստեղ դուր գալիս:
Մարդիկ շատ բարեհամբույր են: Անգամ եթե անգլերեն չգիտեն, փորձում են ինչ-որ բանով օգնել: Սկզբում, երբ եկել էի այստեղ, շատ շոգ էր: Մեքսիկայում նույնպես շոգ է, բայց այնտեղ օվկիանոս եւ քամի կա:
Ի՞նչը դուր չի գալիս Հայաստանում:
Մի քիչ տարօրինակ է, որ այստեղի տղաները, երբ տեսնում են, որ դու օտարերկրացի ես, սկսում են քեզ տարօրինակ նայել:
Իսկ աղջիկնե՞րը:
Գեղեցիկ են:
Շփվու՞մ ես «Փյունիկի» երկրպագուների հետ:
Այո, կան մարդիկ, ովքեր միշտ գալիս են մեր խաղերին: Խաղերից հետո մոտենում են կամ facebook-ում ենք խոսում:
Վեց խաղում դարձել ես չորս գոլի եւ երեք գոլային փոխանցման հեղինակ: Ինչպե՞ս ես գնահատում այդ արդյունքը:
Ես ամեն բան անում եմ, որ էլ ավելի լավ խաղամ: Իմ գործը շատ գոլեր խփելն է: Հուսով եմ` առաջիկա խաղերում էլ իմ թիմի համար ավելի շատ գոլեր կխփեմ:
Ո՞ր ուկումբին ես համակրում:
«Բարսելոնա»:
Բոլոր ժամանակների լավագույն ֆուտբոլիստը:
Բրազիլացի Ռոնալդոն:
Աշխարհի առաջնության ժամանակ ԱՄՆ-ից եւ Մեքսիկայից բացի, ո՞ր թիմին էիր համակրում:
Առաջին տեղում Գերմանիան էր, հետո` Մեքսիկան, հետո` ԱՄՆ-ը:
Վերա Մարտիրոսյան
Հետևեք NEWS.am SPORT-ին Facebook-ում, Twitter և Telegram-ում